साबुन फैक्ट्री म लगिस भीषण आग, करोड़ों के नुकसान के संभावना

भिलाई, 22 मार्च 2021। भिलाई के उमदा रोड स्थित एक साबुन फैक्ट्री म बीते रात भीषण आग लग गए। एखर ले करोड़ों रुपिया के नुकसान होय हे। आग के लपट 10 किलोमीटर दूर ले नजर आवत रहिस। 7 घंटा के कड़ा मशक्कत के बाद आग म काबू पा लेहे गए हे। आग लगे के कारण के अभी पता नइ चल पाये हे। मामला पुराना भिलाई थाना क्षेत्र के हे। भिलाई 3 चौकी के पुलिस ह बतइन कि उम्दा रोड जरवाय गांव म स्थित शिवशंकर सोप फैक्ट्री म भीषण आग लग गए। आग वैक्स यूनिट म लगे हे। रविवार होय के सेती फैक्ट्री म कोनो मजदूर नइ रहिस एखर ले बड़का हादसा टल गए। पुलिस नियंत्रण कक्ष स्थित अग्निशमन सेवा ल सूचना मिलत ही तत्काल अग्निशमन दल ल रवाना करे गीस। आग ल बुझाये बर नगर निगम व बीएसपी के फायर ब्रिगेड के 25 गाड़ी मउका म पहुंचिस। पानी के बौछार व फोम ले आग म काबू पाये गीस। करोड़ों रुपिया के नुकसान होय के संभावना हे। आग कइसे लगिस एखर अभी खुलासा नइ हो पाये हे। शिकायत के बाद मामला म जांच करे जाही। साबुन फैक्ट्री भिलाई 3 के नानकराम व्यापारी के बताये जावत हे।