जल्दी सहायता ले गद्गद् नूतन के पिता आज बिटिया ल लेके पहुंचिस मुख्यमंत्री के घर, मुख्यमंत्री ह बिटिया ल दुलारिन अऊ दीन असीस
जनदर्शन म श्री काशी ठाकुर अपन बेटी के आंखी के इलाज बर सहायता मांगे पहुंचे रहिस
मुख्यमंत्री ले मिलके बताए रहिस अपन व्यथा
चोट के सेती नूतन के जेवनी आंख खराब हो गे रहिस
डॉक्टर मन के सलाह म लगाए गीस पत्थर के आंख, क्षतिग्रस्त आंख म इंप्लांट नइ हो सकय
रायपुर, 03 जुलाई 2024/ मुख्यमंत्री श्री विष्णु देव साय के संवेदनशीलता ले पांच बछर के नूतन ठाकुर के आंखी के इलाज एक हफ्ता के भीतर हो गए हे। नूतन के आंखी म खेल-खेल म चोट लग गए रहिस जेखर से ओखर रेटिना खराब हो गए रहिस। ओखर पिता काशी ठाकुर मुख्यमंत्री निवास म 27 जून के आयोजित जनदर्शन कार्यक्रम म मुख्यमंत्री तीर पहुंचे रहिस ऊ उंखर ले नूतन के आंखी के इलाज करे बर सहायता प्रदान करे के आग्रह करे रहिस, मुख्यमंत्री ह तुरंते अधिकारी मन ल नूतन के बेहतर से बेहतर इलाज करे के निर्देश देहे रहिन।
श्री काशी ठाकुर आज अपन बेटी ल लेके मुख्यमंत्री ले मिले पहुंचिस। मुख्यमंत्री ह नूतन ल दुलार के, नाम पूछिन अऊ नूतन ल अपन आशीर्वाद तको दीन। उमन नूतन ले कहिन के बने सहिन पढ़ई करना। नूतन ह मुख्यमंत्री ल बाल सुलभ सहजता के संग गुलाब के फूल भेंट करिस। काशी ठाकुर घलोक बेटी के इलाज बर मिले जल्दी सहायता बर मुख्यमंत्री जी ल धन्यवाद देवत नइ थकत हे।
जानबा हे कि नूतन के पिता दुर्ग के बोरसीभाटा म रहिथे, ओ ह माली के काम करथे। नूतन के इलाज दुर्गा के शंकराचार्य मेडिकल कॉलेज म चलत रहिस। आंख के स्थिति देखके डॉक्टर मन ह बताए रहिन के आंख म कोनो इंप्लांट नइ हो सकय, ते पाए के नकली आंख लगाना परही। मुख्यमंत्री श्री साय के निर्देश म सरकारी खर्च म नूतन के जेवी आंखी म पत्थर के आंखी लगाए गए हे। नूतन के इलाज बर दुर्ग सीएमएचओ ह 25000 रुपिया के राशि रायपुर के जीईरोड स्थित आर्ट आई सेंटर ल देहे गीस। ये प्रोस्थेटिक सेंटर ये, जिहां कृत्रिम अंग बनाए जाथे। इहां नूतन के जेवनी आंख म पत्थर के आंख लगाए गए हे।
