बगिया, 5 जुलाई 2024। मुख्यमंत्री श्री विष्णु देव साय ह आज ‘एक पेड़ मां के नाम’ अभियान के तहत अपन जन्मभूमि बगिया म अपन माताजी के सम्मान म पौधरोपण करिन। उमन शासकीय हाईस्कूल बगिया परिसर म रुद्राक्ष के पौधा रोपिन। उमन कहिन कि ए अभियान अंतर्गत लगे पौधा जननी अऊ जन्मभूमि के नता ल एक नवा पहिचान देही। मुख्यमंत्री श्री विष्णुदेव साय राज्य स्तरीय शाला प्रवेशोत्सव म सामिल होए इहां पहुंचे रहिन। ए अवसर म उंखर धर्मपत्नी श्रीमती कौशल्या देवी साय ह घलोक रुद्राक्ष के पौधा लगाइन। उहें देश के वित्त मंत्री अऊ जशपुर जिला के प्रभारी मंत्री श्री ओ पी चौधरी ह आंवला के पौधा लगाइन।
मुख्यमंत्री श्री विष्णुदेव साय ह कहिन कि मां के संग रिश्ता अनमोल होथे। जइसे मां हमला जीवन देथे, हमर पालन पोषण करथे, वसनहे प्रकृति घलोक हमार बर जीवनदायिनी हे। एखर सुरक्षा अऊ संवर्धन हमर जिम्मेदारी हे। ये मुहिम ल प्रधानमंत्री श्री नरेंद्र मोदी ह शुरू करे हें, हम सबो ल एमा जुड़ के पर्यावरण संरक्षण म अपन योगदान जरूर देना चाही। ए बेरा म उमन सबो ले “एक पेड़ मां के नाम” अभियान के तहत पेड़ लगाय के आग्रह करिन। संगेच सबो ले पौध के संरक्षण बर संकल्प लेहे ल कहिन। मुख्यमंत्री साय ह कहिन कि ए मानसून म जादा ले जादा पौधरोपण करव। अपन घर, आसपास के परिवेश, गांव अऊ शहर अऊ जंगल मन ल खूब हरा-भरा बनावव। ए अवसर म रायगढ़ लोकसभा क्षेत्र के सांसद श्री राधेश्याम राठिया, विधायक जशपुर श्रीमती रायमुनी भगत, विधायक पत्थलगांव श्रीमती गोमती साय, विधायक आरंग बिर खुशवंत साहेब संग आन जनप्रतिनिधि उपस्थित रहिन।
