दू बाइक म जबरदस्त टक्कर , मउका म दू युवक के दर्दनाक मउत, तीन घायल

आरंग, 21 जुलाई 2020। हरेली तिहार के दिन आरंग थाना क्षेत्र के दू गांव म मातम पसरगे. जब तिहार के संझा ग्राम कुसमुन्द म दू तेज़ रफ़्तार बाइक के जबरदस्त टक्कर म दू युवक के दर्दनाक मउत होगे. ये हादसा म बाइक म बइठे तीन लोगन मन घायल होगे. हादसा के बारे म प्रभारी लेखधर दीवान ह बताइस कि सोमवार के मंझनिया ग्राम तुलसी के रहने वाला यादराम साहू (24) पिता झालाराम अपन बाइक क्रमांक CG 04 MA 7678 म अपन ही गांव के दू युवक गजेंद्र अउ बाली ल बइठा के ग्राम समोदा जावत रिहिस. उहें ग्राम कुसमुंद के रहने वाला दिलहरण कोसले (30) पिता जोहन बाइक क्रमांक CG 04 LC 3778 म गांव के ही युवक देवकुमार के संग समोदा ले ग्राम कोरासी जावत रिहिस. तभे कुसमुंद नाला के तिर सड़क म दुनो तेज रफ्तार बाइक के आमने-सामने ले जबरदस्त टक्कर होगे. ये हादसा म दुनो बाइक चालक यादराम अउ दिलहरण ल गंभीर चोंट आइस, जेखर ले वो दुनो के मउका म ही मउत होगे. उहें दुनो बाइक म बइठे तीन युवक घलो घायल होगे. घटना के सूचना के बाद पुलिस तत्काल मउका म पहुंचगे उहें घायल मन ल 108 संजीवनी आरंग के सामुदायिक स्वास्थ्य केंद्र म लाय गिस. जेन मन ल प्राथमिक उपचार के बाद रायपुर रेफर कर देहे गए हे. ये मामला म आरंग पुलिस ह अपराध दर्ज कर मृतक मन के शव के पोस्टमार्टम करा के परिजन मन ल सौंप दिस हे.