कृषि मंत्री श्री रामविचार नेताम ह दीन बधाई अउ शुभकामना
अंतर्राष्ट्रीय कृषि अउ उद्यानिकी एक्सपो के राष्ट्रीय मंच म छत्तीसगढ़ के 5 उद्यानिकी कृषक सम्मानित
छत्तीसगढ़ उद्यानिकी अउ प्रक्षेत्र वानिकी के स्टॉल ल उत्कृष्ट प्रदर्शनी अउ उद्यानिकी ल बढ़ावा देहे बर मिलीस पहिली पुरस्कार
रायपुर, 25 जुलाई 2024। नई दिल्ली के प्रगति मैदान म 20 ले 22 जुलाई तक सरकार के उपलब्धि मन ल प्रदर्शित करइया अंतर्राष्ट्रीय कृषि अउ उद्यानिकी उपर आयोजित अंतर्राष्ट्रीय मेला म जैविक खेती ल बढ़ावा देहे बर बस्तर अंचल के महिला कृषक ल लाईफ टाईम अचीवमेंट पुरस्कार ले सम्मानित करे गए हे। उहें उद्यानिकी के क्षेत्र म नवाचार अउ उत्कृष्ट काम करइया छत्तीसगढ़ के पांच कृषक मन ल घलोक सम्मानित करे गए हे। कृषि मंत्री श्री रामविचार नेताम ह उद्यानिकी के क्षेत्र म वनांचल क्षेत्र मन संग प्रदेश के किसान मन ल अंतर्राष्ट्रीय मेला म अवार्ड मिले म ओ मन ल बधाई अउ शुभकामना देहे हें।
उद्यानिकी विभाग के अधिकारी मन ह आज इहां बताइन के बस्तर के सुदूर अंचल के आदिवासी बाहुल्य क्षेत्र म 1000 महिला कृषक मन ल आत्मनिर्भर बने के प्रेरणा देहे अउ जैविक खेती ल बढ़ावा देवइया महिला कृषक श्रीमती वेदेश्वरी (बिंदु) शर्मा ल ओ एक्पो म लाईफ टाईम अचीवमेंट पुरस्कार ले सम्मानित करे गीस। बस्तर के जैविक महिला के पदवी प्राप्त श्रीमती शर्मा के मार्गदर्शन म जिला-कोंडागांव के ग्राम कोकोड़ी अउ आस पास के गांव मन के 1000 महिला कृषक, जैविक खेती अपनाके पाछू 6 बछर ले जादा आमदनी अर्जित करत हे। जानबा हे कि 5 एकड़ खेत म श्रीमती शर्मा से पूर्ण जैविक खेती करत हे, इनकर कठिन परिश्रम के परिणामस्वरूप ए मन ल राज्य अउ राष्ट्रीय स्तर म पुरस्कार ले पहिली घलोक सम्मानित करे जा चुके हे।
अइसनहे जिला-बिलासपुर के ग्राम मल्हार के कृषक यदुनंदन प्रसाद वर्मा ल पाछू 5-6 बछर ले 2.5 एकड क्षेत्र म केला, सब्जी आदि के जैविक खेती करे बर प्रशस्ति पत्र प्रदान करे गीस। जिरेनियम के खेती म उत्कृष्ट काम करइया अउ राज्य म एखर खेती ल बढावा देवइया जयराम नगर जिला-बिलासपुर के कृषक लोकेश बालकृष्ण पताडे ल तकनीकी नवाचार बर प्रशस्ति पत्र ले सम्मानित करे गीस। जय किसान नर्सरी, ग्राम बम्हनी चारपारा, जिला राजनांदगांव के कृषक श्री जसवंत कुमार साहू के कुशल मार्गदर्शन अउ अथक प्रयास ले ग्राफ्टेड सब्जी पौध तैयार करे अउ उद्यानिकी के क्षेत्र म नवाचार करे बर प्रशस्ति पत्र ले नवाज़े गीस। पुष्प के खेती म अपन नाम रोशन करइया महिला कृषक श्रीमती अंकिता वर्मा, जिला-रायपुर ल ग्रीन हाउस म गुलाब के फूल के उत्कृष्ट खेती बर प्रशस्ति पत्र ले सम्मानित करे गीस।