डीजीपी श्री अवस्थी ह वीडियो कॉलिंग के संग प्रदेश के 128 थानेदार मन ले करिन बात
रायपुर, 26 जून 2020। मुख्यमंत्री श्री भूपेश बघेल ह प्रदेश के सबो थाना मन ल आदर्श थाना के रूप म विकसित करे के हुकुम देहे हें। मुख्यमंत्री के मंशा के मुताबिक आदर्श थाना अऊ आदर्श थाना प्रभारी योजना 1 जुलाई ले शुरू करे जात हे। इही कड़ी म डीजीपी श्री डीएम अवस्थी ह आज प्रदेश के 128 ले जादा थानेदार मन ले वीडियो कॉलिंग एप के जरिये एक संग बात करिन। उमन कहिन के जऊन आदर्श थाना के तय मापदंड म खरा उतरही ओ मन ल इनाम देहे जाही।
श्री अवस्थी ह सबो थाना प्रभारी मन ल बताइन के आदर्श थाना के कुछ मापदंड तय करे गए हे। जइसे थाना मन म आम जनता के संग थाना प्रभारी अऊ आन स्टाफ के आचरण कइसे हे। पीड़ित मनखे, महिला अऊ लइका मन थाना म बिगर डर के अपन बात कह पापयं। फरियादी मन के संग संवेदनशील व्यवहार रखव अऊ उंखर समस्या मन के तुरंत समाधान करव।
गुंडा-बदमाश मन अऊ असामाजिक तत्व मन के विरुद्ध पुलिस कोति ले कठोरतम कार्रवाई करे जाय। थाना म रिकॉर्ड के रखरखाव अच्छा होवय। थाना परिसर के वातावरण अइसन होवय के घुसतेच मन-मस्तिष्क म सकारात्मक प्रभाव परय। आदर्श थाना बने बर सबो थाना आपस म मेलजोल के संग आगू बढ़े के उदीम करव जेखर से जादा ले जादा थाना आदर्श बन सकय। ये बेरा म एडीजी श्री आर के विज, श्री हिमांशु गुप्ता, दुर्ग आईजी श्री विवेकानंद सिन्हा, रायपुर आईजी डॉ आनंद छावड़ा, एआईजी श्री राजेश अग्रवाल, डीएसपी श्री कवि गुप्ता उपस्थित रहिन।
बोड़ला थाना ल मिलीस केंद्र सरकार ले आदर्श थाना के पुरस्कार-
छत्तीसगढ़ पुलिस बर गरब के बात हे के कबीरधाम जिला के बोड़ला थाना ल केंद्रीय गृह मंत्रालय कोति ले आदर्श थाना के पुरस्कार मिले हे। डीजीपी श्री डीएम अवस्थी ह आज दुर्ग आईजी श्री विवेकानंद सिन्हा, कबीरधाम जिला के एसपी श्री के एल ध्रुव अऊ बोड़ला थाना के टीआई श्री संतराम सोनी ल प्रमाण पत्र प्रदान करिन। जानबा हे के केंद्रीय गृह मंत्रालय कोति ले छत्तीसगढ़ के 465 थाना मन म ले बोड़ला थाना ल एनुअल रैंकिंग ऑफ पुलिस स्टेशन 2019 म सर्वश्रेष्ठ थाना चुने गीस।
