अब मिल सकही पेंशन अऊ राशन के संगे-संग सरकारी योजना मन के लाभ
दंतेवाड़ा, नागरिक मन बर भारतीय विशिष्ट पहचान प्राधिकरण के आधार सेवा केंद्र नवा अऊ सुधरे काम मन के संग बड़े मददतगार साबित होवत हे। इहाँ सबो जरूरी काम एके छत के नीचे असानी ले हो जाथे। दंतेवाड़ा जिला के ग्राम तोयलंका म रहवइया आयते बर आधार सेवा केंद्र कोनो बरदान ले कम साबित नइ होइस। कइ साल ले आधार कार्ड बंद होए के सेती ओला पेंशन, राशन अऊ दूसर सरकारी योजना मन के लाभ लेहे म तकलीफ होवत रहिस। कइ पइत कोसिस करे के बाद घलो ओकर समस्या के समाधाय नइ हो सके रहिस, जेखर से ओ ह अड़बड़ परेशान अऊ उदास रहिस।
एक दिन गाँव के मनखे मन ले ओला जानकारी मिलिस के जिला कलेक्ट्रेट परिसर म आधार सेवा केंद्र चलाए जात हे, जिहाँ आधार ले जुड़े समस्या मन के समाधाय करे जाथे। ए सुन के आयते तुरंते आधार सेवा केंद्र पहुँचिस अऊ अपन तकलीफ उहाँ के कर्मचारी मन ल बताइस। जाँच म पता चलिस के कइ दिन ले ई-केवाईसी (e-KYC) नइ होए के सेती ओकर आधार कार्ड बंद हो गे रहिस। आधार सेवा केंद्र के कर्मचारी मन जरूरी कागजात मन के जाँच करके ओकर ई-केवाईसी के काम ल पूरा कराइन अऊ आधार कार्ड ल फेर चालू कर दीन। पूरा काम सहज, पारदरसी अऊ तय समे म पूरा करे गीस।
आधार कार्ड चालू होए के बाद अब आयते ल पेंशन, राशन अऊ दूसर सरकारी योजना मन के लाभ मिले म कोनो किसम के रुकावट नइ हे। ओकर कइ साल जुन्ना समस्या के समाधाय होए ले ओ ह बहुत खुस हे। आयते ह जिला प्रशासन अऊ आधार सेवा केंद्र के कर्मचारी मन के भारी जस मनावत धनबाद दीस अऊ कहिस के आधार सेवा केंद्र के सुविधा ले ओकर बड़का तकलीफ दूर हो गे हे। अब ओ ह बिना कोनो बाधा के सरकार के योजना मन के लाभ पा सकही। ए पहल गाँव-देहात के नागरिक मन तक सरकारी सेवा मन ल सहज अऊ सुलभ बनाए के दिसा म एक बड़े कदम हे।