आदिवासी नृत्य महोत्सव ले छत्तीसगढ़ी सांस्कृतिक धरोहर मन के आन राज्य मन म प्रचार-प्रसार होही: श्री उमेश पटेल

खेल मंत्री रायगढ़ म आयोजित जिला स्तरीय ट्राइबल डांस फेस्टिवल 2019 म होइन सामिल

रायपुर, खेल अऊ युवा कल्याण मंत्री श्री उमेश पटेल ह कहिन कि प्रदेश म पहली पइत आयोजित राष्ट्रीय आदिवासी नृत्य महोत्सव के माध्यम ले राज्य के परम्परागत छत्तीसगढ़ी सांस्कृतिक धरोहर मन के आन राज्य मन म प्रचार-प्रसार के अवसर मिलही। श्री पटेल आज रायगढ़ जिला मुख्यालय के सांस्कृतिक भवन (आडिटोरियम) पंजरी प्लांट म आयोजित जिला स्तरीय ट्राइबल डांस फेस्टिवल 2019 कार्यक्रम ल सम्बोधित करत रहिन। ये कार्यक्रम म अध्यक्ष के रूप म रायगढ़ विधायक श्री प्रकाश शक्राजीत नायक, विशिष्ट अतिथि के रूप म लैलूंगा विधायक श्री चक्रधर सिंह सिदार के संग आन अतिथि उपस्थित रहिन।

ये बेरा म मंत्री श्री पटेल ह सबो भाग लेवईया मन ल अपन शुभकामना देवत कहिन कि राज्य के मुख्यमंत्री श्री भूपेश बघेल के निर्देशन म आयोजित नेशनल ट्राईबल डांस फेस्टिवल 2019 के उद्देश्य ही हे कि छत्तीसगढ़ के पारंपरिक सांस्कृतिक धरोहर जइसे गेड़ी नृत्य, कर्मा नृत्य, छत्तीसगढ़ी गीत, रौहताही नृत्य जइसे कई दर्जन सांस्कृतिक कला के पूरा देशवासी मन ल जानकारी दिए जा सकय अऊ छत्तीसगढ़ी कलाकार अउ सांस्कृतिक परंपरा मन ल अलग पहिचान मिल सकय। श्री पटेल ह आगू कहिन कि ये नेशनल ट्राईबल डांस फेस्टिवल 2019 कार्यक्रम बर दूसर राज्य के मुख्यमंत्री मन ल आमंत्रित करे जावत हे, ताकि आन राज्य मन के मुख्यमंत्री या ऊंखर प्रतिनिधि इहां कार्यक्रम ल देखे आवयं अऊ ऊंखर माध्यम ले हमार राज्य के सांस्कृतिक धरोहर मन के ऊंखर राज्य मन म प्रचार-प्रसार के अवसर मिलय। एखर से छत्तीसगढ़ी नृत्य अऊ कला ल देश के आन राज्य मन म अलग पहिचान मिलही। कार्यक्रम म कलेक्टर श्री यशवंत कुमार ह आयोजन के सराहना करत जिला के भाग लेवईया मन ल आदिवासी नृत्य महोत्सव के शुभकामना दीन। ये बेरा म मुख्य कार्यपालन अधिकारी जिला पंचायत सुश्री ऋचा शर्मा संग आन जनप्रतिनिधि उपस्थित रहिन।