आज ले आपमन के WhatsApp म साइबर सेल के नजर रही… DGP ह छत्तीसगढ़ पुलिस ल अलर्ट मोड म रहे के निर्देश दिए हे.. आईजी अउ एसपी के संग होइस वीडियो कॉफ्रेंसिंग..

रायपुर । 27 फरवरी 2020। देश के राजधानी दिल्ली म होय हिंसक घटना के मद्देनजर राजधानी रायपुर सहित पूरा प्रदेश म अलर्ट जारी करे गए हे। छत्तीसगढ़ के DGP ह सबो रेंज आईजी अउ 28 जिला मन के एसपी के वीडियो कॉन्फ्रेस करके अलर्ट रहे के निर्देश दिए हे। नवा रायपुर स्थित पुलिस मुख्यालय म होय बइठक म एडीजी इंटेलिजेंस हिमांश गुप्ता, अशोक जुनेजा अउ रायपुर रेंज आईजी आनंद छाबडा सहित रायपुर एसएसपी शेख आरिफ मौजूद रहिन।
बइठक म डीजीपी ह सबो जिला के एसपी रेंज आईजी ल आज ले ही अपन जिला मन कानून व्यवस्था के समीक्षा करे के संग-संग अलर्ट मोड म रहे के निर्देश जारी करे गए हे। डीजीपी मीटिंग के बाद रायपुर एसएसपी ह सबो सीएसपी अउ थानेदार मन के बैइठक लीन। सबो थानेदार मन ल अपन-अपन इलाका म अतिरिक्त गश्त करे के निर्देश दिए हे।
एखर अलावा कोनो भी तरह के गड़बड़ी करने वाला मन के उपर सख्त कार्रवाई करे बर बोले हे। दरअसल सोशल मीडिया म धार्मिक उन्माद सहित देशद्रोही मैसेज वायरल होवत हे अइसन करने वाला उपर सायबर सेल ल नजर रखे के संग-संग अलर्ट रहे के निर्देश दिए हे।