रइपुर, 17 अगस्त 2021 मंगल। मुख्यमंत्री दाउ भूपेश बघेल ह अपन घरू कार्यालय ले वीडियो कॉन्फ्रेंसिंग ले नवा रइपुर के सेक्टर 29 म नवा उप पंजीयक कार्यालय के लोकार्पण समारोह ल सम्बोधित करत कहीन कि राज्य सरकार जन सुविधा खातिर आम जनता ले जुड़े सेवा मन के प्रक्रिया के सरलीकरण अउ बेहतर बनाए बर प्रतिबद्ध हवय। नवा रइपुर म पंजीयन कार्यालय चालू होए ले नवा रायपुर के 6 गांव, आरंग के 20 अउ अभनपुर विकासखंड के 15 गांव कुल 41 ठिन गांव के लोगन मन ल पंजीयन कार्य के सुविधा मिलही। एकर ले उन्कर समे अउ श्रम के बचत होही।
मुख्यमंत्री दाउ बघेल ह कार्यक्रम म पंजीयन विभाग के बैकलॉग दस्तावेज मन के स्कैनिंग अउ डिजिटाइजेशन कार्य अउ डिजिटल ई-स्टाम्प सुविधा के तको शुभारंभ करीन। उन मन नवा रायपुर के उप पंजीयक कार्यालय म पंजीयन कराए बर पहुंचे ग्राम परसदा के श्रीमती रेखा कोसले जउन ह मंदिर हसौद म जमीन खरीदत हावय उन्कर संग चर्चा करीन। उन्कर मंदिर हसौद म 962 वर्ग फीट जमीन के पंजीयन होइस तेकर पंजीयन के दस्तावेज सौंपे गइस।
मुख्यमंत्री कहीन कि छत्तीसगढ़ म वर्तमान म 98 पंजीयन कार्यालय हवय। नवा रायपुर मिलाके अब 99 पंजीयन कार्यालय हो जाही। बछर 2020-21 म दस्तावेज मन के पंजीयन ले छत्तीसगढ़ ल 1589 करोड़ रुपिया के राजस्व मिले रिहिस। येमा 545 करोड़ रुपिया के राजस्व अकेल्ला रइपुर जिला ले मिले हे जउन कुल राजस्व के 34 प्रतिशत हवय।
आम जनता के सेवा—प्रक्रिया के सरलीकरण अउ विस्तार बर प्रतिबद्ध : मुख्यमंत्री दाउ भूपेश बघेल
