महिला बाल विकास के सचिव ह करिन मुख्यमंत्री सुपोषण अभियान के समीक्षा
बिलासपुर 15 फरवरी 2020। सबो कुपोषित लइका आंगनबाड़ी केन्द्र आवयं अऊ पोषण आहार ले लाभान्वित होवयं। लइका अऊ गर्भवती अउ शिशुवती महिला मन म कुपोषण दूर करे बर उमन म भोजन के आदत म बदलाव बर जागरूक लाए जाए। महिला अउ बाल विकास विभाग के सचिव श्री सिद्धार्थ कोमल परदेशी ह आज मुख्यमंत्री सुपोषण अभियान के बिलासपुर अउ गौरेला-पेण्ड्रा-मरवाही जिला म क्रियान्वयन के समीक्षा करत ये हुकुम दीन।
मंथन सभाकक्ष म आयोजित बैठक म श्री परदेशी ह हुकुम दीन के कुपोषण ले ग्रसित शत-प्रतिशत लइका मन के चिन्हांरी करके उमन ल मुख्यमंत्री सुपोषण अभियान म सामिल करे जाए। कुपोषित लइका जादा समय तक भूखे झन रहय। एकर खातिर लइका आंगनबाड़ी केन्द्र म आए के पहिली अपन घर ले नाश्ता करके आवयं अऊ घर जाय के बाद घलोक भोजन करयं अउ रात म घलोक उन ल पौष्टिक भोजन मिलय। ये आंगनबाड़ी कार्यकर्ता मन मॉनिटरिंग करयं। कुपोषित लइका मन के घर के सदस्य मन अऊ उंखर माता मन ल घलोक ए संबंध म जागरूक करे जाए। हर एक लइका मन म कुपोषण के अलग-अलग कारण होथे। जेला चिन्ह के उनला कुपोषण ले मुक्त करे बर काम करव। जऊन लइका सुपोषित हो गे हे ओ मन फेर कुपोषित झन होवयं, एखर खातिर सरलग निगरानी करे जाय।
श्री परदेशी ह आंगनबाड़ी केन्द्र मन म पोषण वाटिका बनाए के हुकुम तको दीन। जिहां मुनगा, पपीता आदि के पेड़ अउ पौष्टिक साग-भाजी लगाए जा सकय। उमन मुख्यमंत्री कन्या विवाह प्रोत्साहन योजना के तहत गरीब कन्या मन के विवाह बर कार्ययोजना बनाए के हुकुम दीन। प्रधानमंत्री मातृ वंदना योजना के तहत हितग्राही मन ल समय म भुगतान सुनिश्चित करे अउ एखर मासिक समीक्षा करे के हुकुम घलोक दीन। संगेच आंगनबाड़ी केन्द्र मन म खाली पद मन ल घलोक लउहे भरे ल कहिन।
बैठक म कलेक्टर डॉ.संजय अलंग ह कहिन कि लइका मन ल जादा समय तक भूखे रखे ले ओमां कुपोषण आथे। ए म आंगनबाड़ी कार्यकर्ता मन ल विशेष ध्यान रखना चाही। आंगनबाड़ी केन्द्र म प्रदान करे वाले भोजन म विविधता लाके पौष्टिकता ल बढ़ावयं। लइका मन ल दिन भर कुछ न कुछ खाना मिलना चाही।
साढ़े 3 हजार लइका मन होइन कुपोषण ले मुक्त
बैठक म सचिव श्री परदेशी ह ए बात म प्रसन्नता जाहिर करिन कि बिलासपुर जिला म मुख्यमंत्री सुपोषण अभियान के तहत 26 हजार 816 कुपेाषित लइका मन म ले साढ़े 3 हजार लइका मन ल तीन महिना म कुपोषण ले मुक्त करे गीस। अभियान म 0 ले 5 साल के 26 हजार ले जादा लइका अऊ 6 हजार ले जादा गर्भवती माता मन ल अकतहा पोषण आहार देहे जात हे। कुपोषित लइका मन ल हफ्ता म दू दिन पौष्टिक लड्डू अऊ गर्भवती माता मन ल आंगनबाड़ी केन्द्र मन म गरम जेवन देहे जात हे। अभियान के फलस्वरूप कुपोषण ले सामान्य श्रेणी म आये लइका मन के संख्या जऊन अकटूबर महिना म 0.37 प्रतिशत रहिस, वो महिना जनवरी म बढ़के 13.33 प्रतिशत हो गए हे।
बैठक म अपर कलेक्टर श्री बी.सी.साहू, जिला कार्यक्रम अधिकारी श्री सुरेश सिंह, जिला महिला अउ बाल विकास अधिकारी श्रीमती नेहा राठिया, विभाग के सीडीपीओ, सुपरवाईजर उपस्थित रहिन।
