रायपुर, मुख्यमंत्री श्री भूपेश बघेल ह अइसन जिला जिहां कोविड संक्रमण के रोकथाम बर आंगनबाड़ी अऊ मिनी आंगनबाड़ी केन्द्र मन ल बंद करे गए हे, उहां सबो श्रेणी के पात्र हितग्राही मन ल रेडी-टू-ईट वितरण जारी रखे के निर्देश देहे हें। एखर संगेच गर्भवती माता अउ 3 ले 6 साल के लइका मन ल घर-घर जाके टिफिन के माध्यम ले गरम भोजन देहे ल कहे गए हे। जानबा हे कि कोविड-19 के अभी हाल के प्रसार ल ध्यान म रखत राज्य सरकार ह कोरोना वायरस के संक्रमण के रोकथाम बर 4 प्रतिशत ले जादा पॉजिटिविटी दर वाले जिला मन म आंगनबाड़ी अऊ मिनी आंगनबाड़ी केन्द्र मन के संचालन तुरंत प्रभाव ले बंद रखे के निर्देश देहे हें।
ये संबंध म मंत्रालय ले महिला अउ बाल विकास विभाग कोति ले सबो कलेक्टर, संभागायुक्त, जिला कार्यक्रम अधिकारी, जिला महिला अउ बाल विकास अधिकारी अऊ बाल विकास परियोजना अधिकारी मन ल निर्देश जारी कर दे गए हे। जारी निर्देश म कहे गए हे कि मुख्यमंत्री सुपोषण अभियान के अन्तर्गत जिला स्तर म निरधारित मीनू मुताबिक गरम भोजन अउ पोषण सामान के वितरण यथावत् रहिही। सार्वजनिक कार्यक्रम जइसे सुपोषण चौपाल, समूह के बैठक आदि नइ होवय। गृह भेंट के माध्यम ले स्वास्थ्य अउ पोषण शिक्षा अऊ सजग अभियान अन्तर्गत प्राथमिक बाल्यावस्था देखभाल अऊ शिक्षा (ईसीसीई) के गतिविधि सरलग रखे जाही। एखर संगेच अधिकारी मन ल कोविड प्रोटोकाल ल ध्यान म रखत लइका मन के बढ़वार के निगरानी अऊ लइका मन अउ महिला मन के नियमित टीकाकरण अऊ स्वास्थ्य जांच करे ल कहे गए हे।
जारी निर्देश म आंगनबाड़ी मन के बंद रहे के समय आंगनबाड़ी केन्द्र मन म स्वच्छता रहय एखर बर नियमित साफ-सफाई सुनिश्चित करे ल कहे गए हे। एखर संगेच आंगनबाड़ी केन्द्र म उपलब्ध चांउर अऊ आन कच्चा सामान ल खराब होए ले बचाय बर सुरक्षित भंडारण करे के निर्देश देहे गए हे।
आंगनबाड़ी मन म रेडी-टू-ईट बंटई नइ होवय बंद
