जब हाथ म आवेदन लेके मंत्री के आगू खड़े हो गें महिला मन

रायपुर, 10 फरवरी 2021। अपन विधानसभा क्षेत्र आरंग म कई ठन विकास काम मन के भूपिजन अऊ लोकार्पण करे पहुचे नगरीय प्रशासन मंत्री डॉ. शिवकुमार डहरिया ह मंदिर हसौद, बहनाकाड़ी, बड़गांव,गोढ़ी, भानसोज, सकरी, अऊ अकोलीखुर्द म मुख्यमंत्री सुगम सड़क योजना के भूमिपूजन करिन। ये बेरा म उमन लाखों रुपिया के विकास काम मन के घोषणा घलोक करिन। अइसनेच एक कार्यक्रम म मंत्री डॉ.डहरिया जब ग्राम बड़गांव म नवा सड़क निर्माण के भूमिपूजन करे पहुचिन त उहां गांव के महिला श्रीमती चमेली वर्मा, विमला वर्मा अऊ लोकेश्वरी वर्मा कुछ आन महिला मन के संग आवेदन लेहे उहां पहुचिन। सड़क निर्माण काम के विधिवत भूमिपूजन के बाद मंत्री ह माइक म गांव वाले ल संबोधित करना शुरू करिन। एखर से पहिली के मंत्री जी माइक म संबोधन पूरा कर पातिन, तीर म खड़े ए महिला मन ह बार-बार मंत्री ल आवेदन देहे के कोसिस करे लगिन। मंत्री ह ओ मन ल संबोधन पूरा करे के बाद देहे के आग्रह घलोक करिन। एखर ले पहिली के मंत्री जी अपन संबोधन पूरा खतम कर पातिन उमन माइक ले कुछ अइसन बात कहि दीन के हाथ म आवेदन रखे महिला मन ह मंत्री ल आवेदन ही नइ दीन।
दरअसल गांव के महिला मन गांव के विकास काम ले संबंधित काम मन के स्वीकृति बर मंत्री डॉ. डहरिया ल अपन आवेदन देना चाहत रहिन। अपन स्व-सहायता समूह के लेटर पेड म उमन मांग घलोक लिखे रहिन। इही बीच ओ मन अपन आवेदन मंत्री जी के हाथ म दे पातिन कि मंत्री डॉ.डहरिया ह माइक म अपन संबोधन के आखरी समें म ओसरी-पारी गांव के विकास बर बहुत अकन काम मन के घोषणा शुरू कर दीन। मंत्री के घोषणा म अपन मांग ल पूरा होत सुन के गावं के ए महिला मन के संग ग्रामवासी मन म खुशी के लहर दौड़ गीस अऊ सबो मन ह मंत्री के सम्मान बर जोर-जोर से नारा लगाना शुरू कर दीन अऊ अड़बड़ ताली बजाईन। मंत्री डॉ. डहरिया ह जब अपन संबोधन खतम करिन अऊ ए महिला मन ले कहिन अब मोर गोठ खतम होगे, तुमन अपन गोठ शुरू करौ, बताव का आवेदन हे? त महिला मन ह अपन आवेदन अपन तीरे रख लीन अऊ कहिन कि आप मन तो हमर मांग बिना आवेदन देहे ही पूरा कर देव। अब आपला आवेदन देहे के जरूरत नइ हे। मंत्री डॉ. डहरिया मुस्काइन अऊ कहिन कि आप सब मन ल बधाई हो कि आप मन के मांग पूरा हो हे।