गंवई अर्थव्यवस्था ल पोठ करेच म देश अउ राज्य म आर्थिक सुधार अउ बुनियादी बदलाव संभव : मुख्यमंत्री दाउ भूपेश बघेल

रायपुर, 26 मार्च 2021 शुकवार। छत्तीसगढ़ के मुख्यमंत्री दाउ भूपेश बघेल ह कहीन कि गंवई अर्थव्यवस्था ल सुदृढ़ करेच म देश अउ राज्य म आर्थिक सुधार अउ बुनियादी बदलाव हो सकत हे। ये बेरा म उन्मन गंवई अर्थव्यवस्था ल मजबूत करे म जोर दीन । दाउ बघेल ह आज नई दिल्ली म आयोजित 7 वां इंडियन इकोनॉमिक कॉन्क्लेव म संघरीन अउ उहां उन्मन देश के अर्थव्यवस्था ल सुधारे खातिर आम लोगन मन ल आर्थिक रूप सक्षम करे के बात कहीन। कॉन्क्लेव म देश भर ले आए आने आने गणमान्य लोगन मन तको रिहिन हे।
इकोनॉमिक कॉन्क्लेव म दाउ बघेल ह कहीन कि गंवई विकास उपर आधारित योजना मन ले छत्तीसगढ़ के गांव मन म सवे दू साल म बड़का बदलाव दिखत हावय । राज्य सरकार के गठन के संग हमन छत्तीसगढ़ के आर्थिक विकास बर एक रोड मैप तियार करेन । जेकर तहत पहिली किसान मन के ऋण माफ करेन, 25 सौ रूपए प्रति कोंटल म धान खरीदेन, आदान सहायता के रूप म किसान मन ल 5 हजार करोड़ रूपिया के राशि देन, समर्थन मूल्य म वनोपज खरीदेन, मनरेगा के तहत रोजगार उपलब्ध कराएन, जेकर ले किसान, गरीब अउ मजदूर मन के आर्थिक स्थिति म सुधार होइस । दाउ बघेल ह एक सवाल के जुवाब म कहीन कि अवइया बछर म छत्तीसगढ़ के देश के अर्थव्यवस्था म जबर योगदान होही।
राज्य सरकार कइयो अकन योजना मन के माध्यम ले गाव मन म रोजगार के अवसर बढ़ावत हावय। कोर सेक्टर के छोड़ ग्रामोद्योग ल बढ़ावा देवत हावय। उन्मन कहीन छत्तीसगढ़ सरकार रोजगार के संगे —संग स्वास्थ्य अउ शिक्षा के क्षेत्र में घलो महत्वपूर्ण बूता कर​त हावय। ये बेरा म मुख्यमंत्री ह बताइन कि कोरोना ले उपजे आर्थिक संकट के बेरा म तको छत्तीसगढ़ के अर्थव्यवस्था गतिशील बने रिहिस। ये बेरा म आटोमोबाइल सेक्टर म तेजी, जीएसटी संग्रहण मे बढ़ौतरी अउ सबले जादा वनोपज के खरीदी करे गइस।