आशा के किरण जगा,डॉक्टरी सलाह मान घरे म रहीके वैष्णव दंपति दीन कोरोना ल मात

बलौदाबाजार, 29 अप्रैल 2021 बिरस्पत।
जिहाँ चारो मुड़ा कोरोना के खबर ले लोगन के मनोबल टूटत हे उहेेंं बलौदाबाजार जिला म लोगन म आशा के किरण देखाकेे डॉक्टर मन कोरोना मरीज मन ल होम आईसोलेशन म रखके स्वस्थ करत हावय । अइसनेहेच निराशा के बीच गांव रवान के वैष्णव दंपति ह कोरोना वायरस ल हरो दीन। वैष्णव दंपति ल 15 दिन पहिली बुखार अउ सर्दी होइस। भोजन बेस्वाद अउ खुशबू तको गंधहीन लगे लगीस। कोरोना टेस्ट पॉजिटिव आइस । घर म नान्हे —नान्हे लइका मन ल देखके वोमन कोविड हास्पिटल जाए के सोचत रिहिने। फेर डाक्टर मन सलाह दीन कि दवई के बरोबर सेवन अउ कोविड नियम मन के पालन करे मन लउहे बने हो जाहू। उन मन घरे म रहीके दवई लेेहे लगीन । सरलग समाचार म होवत मउत अउ आक्सीजन के कमी ले मन बइठे लेवय फेर डाक्टर सरलग ढाँढस बढा़वत रिहिन रहे। जेकर सुखद परिणाम मिलीस अउ पंद्रह दिन तक डॉक्टर मन के सलाह अउ दवई मन के सेवन करके मनहरण वैष्णव उम्र 59 बछर अउ उन्कर सुवारी आज पूर्णतया स्वस्थ हो गे । ये संबंध म मनहरण वैष्णव बताइन कि एक पइत लगे लग रिहिसे कि अब हम ये दुनिया म नइ रहिबो फेर डाक्टर मन हमर मनोबल ल टूटन नइ दीन अउ उन्कर सलाह ले हमर परिवार पूर्णतः स्वस्थ होगेे । सबो ले इही अनुरोध करहूं कि ये विकट स्थिति म अपन मनोबल ल झन टूटन देवयं। आत्मविश्वास बनाये रखयं अउ डॉक्टर मन के सलाह म दवई के सेवन करयं, सबो लउहे स्वस्थ हो जाहव।