आरू साहू ह राज्यगीत अरपा पैरी के धार गा के शिवनाथ महोत्सव के सुरूवात करीस

राजनांदगांव, छत्तीसगढ़ के राजनांदगांव जिला म शिवनाथ नदी के किनारे मोहारा म 11 नवम्बर ले तीन दिवसीय शिवनाथ महोत्सव अऊ कार्तिक पुन्नी मेला शुरू हो गीस। कलेक्टर जयप्रकाश मौर्य ह महोत्सव के शुभारंभ करिस। जिला प्रशासन अऊ नगर निगम राजनांदगांव कोति ले आयोजित ये महोत्सव के पहली सांस्कृतिक संध्या म धमतरी जिला के शान सिहावा नगरी के पहिचान नान्हे गायिका आरू साहू ह राज्यगीत ”अरपा पैरी के धार.. गाके सांस्कृतिक संध्या के शुरूआत करिस।
भिलाई के बालिका अन्वेषा भाटिया ह शिव तांडव नृत्य के शानदार प्रस्तुति दीस। महेश्वर दास साहू के लोकमंच के कलाकार मन ह आकर्षक कार्यक्रम दीन। मनमोहक आदिवासी नृत्य के प्रस्तुतिकरण घलोक होइस। कार्यक्रम म नगर निगम राजनांदगांव के महापौर मधुसूदन यादव, अध्यक्ष शिव वर्मा, पुलिस अधीक्षक बीआर ध्रुव, वन मंडलाधिकारी राजनांदगांव बीपी सिंह, अपर कलेक्टर ओंकार यदु, नगर निगम आयुक्त चन्द्रकांत कौशिक संग आन जनप्रतिनिधि, कला प्रेमी नागरिक अऊ वरिष्ठ अधिकारी उपस्थित रहिन।