किसान देवनाथ नायक पारंपरिक खेती ल छोड़के करत हे आधुनिक खेती

सारंगढ़ बिलाईगढ़, 13 मई 2024। जिला के बरमकेला विकासखंड के ग्राम पंचायत देवगांव के देवनाथ नायक किसान अपन 9 एकड़ जमीन म पाछू 9 साल ले पारंपरिक खेती छोड़के आधुनिक तरीका ले धनिया के खेती करत हे। एखर से वो अब तक 7 ले 8 लाख के कमई कर डरे हे। पहिली ओ हह पारंपरिक फसल के खेती करत रहिस। एखर से ओ ल अतका कमई नइ होवत रहिस। अइसन म वो ह 9 साल पहिली पारंपरिक फसल के खेती छोड़के वैज्ञानिक विधि ले धनिया के फार्मिंग शुरू कर दीस। खास बात ये हे कि धनिया के खेती शुरू करतेच देवनाथ नायक के किस्मत बदल गे।

किसान देवनाथ नायक  ह बताइस कि धनिया के खेती 7 से 8 साल ले करे जात हे। वो ह बताइस कि धनिया के खेती करे म ओखर बहुत रूचि हे अऊ जानकारी घलोक हे। शुरुआत 9 एकड ले करे रहिस। वोमें 7 लाख कमाइस अभी अभी हाल म दू एकड़ म धनिया के खेती करत हे, जेमां रेट के हिसाब ले आमदनी होथे, जेन म कभू 35 हजार त 70 हजार अइसन कमाई होथे। वो ह बताइस कि दू विधि ले खेती होथे। रेन पाइप अउ बैड विधि, बैड विधी के खेती के तुलना म धनिया पत्ती के उत्पादन जादा अउ वजन घलोक जादा होथे। 1 एकड़ म लगभग 10 ले 12 हजार के लागत लगथे एखर बिक्री बर व्यापारी खुदे खेत म पहुंचके धनिया ल लेहे आथे।