मुख्यमंत्री श्री बघेल ह अबूझमाड़ के छोटेडोंगर म आम जनता ले करिस भेंट-मुलाकात

रायपुर, मुख्यमंत्री श्री भूपेश बघेल आज भेंट मुलाकात कार्यक्रम के दूसर चरण के तीसर दिन अबूझमाड़ नारायणपुर जिला के छोटेडोंगर पहुंचिन। मुख्यमंत्री ह सबले पहिली देवगुड़ी पहुंचके माता गुड़ी म पूजा अर्चना करिन अऊ प्रदेशवासी मन के सुख-समृद्धि के कामना करिन। उमन देवगुड़ी प्रांगण म कदम के पौधा लगाइन। ये दौरान मुख्यमंत्री श्री भूपेश बघेल ह गायता (पुजारी मन) ले चर्चा करिन अऊ ओ मन ल उपहार म धोती-कुर्ता भेंट करिन। मुख्यमंत्री श्री भूपेश बघेल ल पुजाारी मन ह आदिवासी परंपरा के चिनहा स्वरूप पागा बांधके सम्मानित करिन। मुख्यमंत्री श्री भूपेश बघेल ह छोटेडोंगर म 18 करोड़ रूपिया के लागत ले आदिवासी संस्कृति अउ आस्था के केंद्र 104 देवगुड़ी मन अउ 104 घोटुल के जीर्णोद्धार के काम के भूमिपूजन घलोक करिन।