छत्तीसगढ़ हस्तशिल्प विकास बोर्ड के अध्यक्ष श्री चंदन कश्यप ह करिस शुभारंभ
नारायणपुर, छत्तीसगढ़ हस्तशिल्प विकास बोर्ड के अध्यक्ष श्री चंदन कश्यप ह काली नारायणपुर म अबूझमाड़ हस्तशिल्प महोत्सव 2021 के शुभारंभ करिस। ये आयोजन नारायणपुर जिला प्रशासन प्रशासन अऊ पंखुड़ी सेवा समिति के संग संघरा करे जात हे। ये 7 दिन के महोत्सव के आयोजन 14 नवम्बर ले 21 नवम्बर तक बांस शिल्प केन्द्र म करे जात हे। ये कार्यक्रम के उद्देश्य कई प्रांत के शिल्पी अऊ कलाकार मन ल अपन कला के प्रदर्शन करे अऊ प्रदेश संग अबूझमाड़ के कला मन ल देखे अऊ समझे के सुग्घर अवसर जनता मन ल प्रदान करना हे।
अबूझमाड़ क्षेत्र के कलाकृति मन प्रदेशे भर म नहीं भलुक देश-विदेश म घलोक प्रसिद्ध हे। अबूझमाड़ हस्तशिल्प महोत्सव के बेरा म रोजेच कई कार्यक्रमों के प्रस्तुति होही। ये महोत्सव म रोजेच आन-आन कार्यक्रम आयोजित करे जाही। जेमा 15 नवम्बर के बांस शिल्पकार मन कोति ले सांस्कृतिक कार्यक्रम, 16 नवम्बर के कवि सम्मेलन, 17 नवम्बर के नारायणपुर सांस्कृतिक समूह कोति ले लाईव आर्केस्ट्रा, 18 नवम्बर के चित्रकला प्रतियोगिता, 19 नवम्बर के प्रियदर्शिनी महोत्सव (श्रीमती इंदिरा गांधी) के जन्मदिन के उपलक्ष्य म, 20 नवम्बर के ओपन स्टेज अऊ 21 नवम्बर के जगदलपुर आर्केस्ट्रा के प्रस्तुति अऊ पुरस्कार वितरण करे जाही। ये महोत्सव म बस्तर आर्ट, बेलमेटल ज्वेलरी, माटीकला, लौह शिल्प, बांस शिल्प, हैण्डलुम अऊ हैंडीक्राफ्ट, काटन ड्रेस, ड्राईफ्लावर, चेंदरी साड़ी, बेलमेटल, टेराकोटा, डिजाईनर ज्वेलरी, जरदोजी वर्क, चिकन वर्क, वूडन आर्ट, जयपुरी लाख, बैंगल होम डेकोर, साउथ पर्ल, कारपेट, कश्मीरी शाल, सहारनपुर फर्नीचर, बम्बू फर्नीचर, सिल्क मटेरियल, कोसा साड़ी, फलकारी आदि के स्टॉल लगाये जाही।