राष्ट्रपति श्रीमती मुर्मु ह करिन प्रशंसा, ताली बजा के बढ़ाइन उत्साह
जगदलपुर, छत्तीसगढ़ के अबूझमाड़ ह सुकवार के दिन अपन प्रतिभा के परचम लहराइस। जगदलपुर के लालबाग मैदान म आयोजित संभाग स्तरीय बस्तर पण्डुम के शुभारंभ समारोह म ‘अबूझमाड़ मल्लखंब एंड स्पोर्ट्स एकेडमी’ के नान-नान खिलाड़ी मन ह देश के सर्वोच्च संवैधानिक पद म बइठे राष्ट्रपति श्रीमती द्रौपदी मुर्मु के आगू मल्लखंब के अद्भुत प्रदर्शन करके सबो ला मंत्रमुग्ध कर दिन।
ये ह पहिली मौका रिहिस जब अबूझमाड़ इलाका के लइका मन एक संग राष्ट्रपति के आगू म मल्लखंब के जीवंत अउ साहसिक कला देखाइन। लकड़ी के खंभा म जब ये नान-नान कलाकार मन ह गजब के संतुलन, फुर्ती अउ कठिन करतब देखाइन, त मैदान म जतका मनखे रिहिन सबो अचरज म पर गे। जोश, अनुशासन अउ बढ़िया तकनीक ले सजे ये प्रस्तुति ह पूरा माहौल ला भावविभोर कर दिस।
राष्ट्रपति श्रीमती द्रौपदी मुर्मु ह खुद लइका मन के प्रतिभा ले बहुते प्रभावित होइन। उमन न केवल लइका मन के साहस, कला अउ अनुशासन के जमके तारीफ करिन, बल्कि ओमन के उज्ज्वल भविष्य बर असीस घलो दीन।
ये ऐतिहासिक उपलब्धि के नेंव नारायणपुर जिला के ओ दुर्गम अउ बीहड़ इलाका मन म पड़े हवय, जिहाँ आज घलो बुनियादी सुविधा मन कम हवय। कुटूर, करपा अउ परपा जइसन सुदूर वनांचल ले निकल के ये लइका मन ह ये साबित कर दिन के प्रतिभा ह न त संसाधन के मोहताज होथे अउ न ही भौगोलिक सीमा के।
ये संघर्ष ले भरे यात्रा के प्रेरणास्रोत मनोज प्रसाद हवय, जे ह एकेडमी के संस्थापक होय के संगे-यंग 16वीं बटालियन म आरक्षक के रूप म अपन सेवा घलो देवत हवय। ओखर कुशल नेतृत्व, अनुशासन अउ लगातार मार्गदर्शन म ये लइका मन ह अभाव ला पाछू छोड़त हुए राष्ट्रीय अउ अंतरराष्ट्रीय स्तर म अपन एक अलग पहिचान बनाय हवय।
ये नान-नान मल्लखंब खिलाड़ी मन ह ‘इंडियाज गॉट टैलेंट’ के खिताब जीतके अउ ‘रोमानियाज गॉट टैलेंट’ म उपविजेता बनके पहिलिच दुनिया भर म अपन प्रतिभा के लोहा मनवा चुके हवय।
भारत समेत दुनिया के अलग-अलग देश मन म 40 ले 50 ले जादा टेलीविजन शो, देशभर म सैकड़ों मंचीय प्रस्तुति, अउ कतको प्रतियोगिता मन म सोना अउ चांदी के पदक जीतके ये टोली ह सरलग सफलता के नवा अयाम बनावत हवय।
अब ये दल ह अपन माटी के खुशबू, लोक-संस्कृति अउ अजोड़ हुनर ला अउ जादा मजबूती के साथ सात समंदर पार ले जाय बर तइयार हवय। एकेडमी के अगला लक्ष्य ह भविष्य म ‘अमेरिकाज गॉट टैलेंट’ अउ ‘ब्रिटेन्स गॉट टैलेंट’ जइसन बड़े वैश्विक मंच मन म भारत अउ अबूझमाड़ के लोक-कला ला देखाना हवय।
जगदलपुर म होय ये ऐतिहासिक प्रदर्शन ह न केवल अबूझमाड़ मल्लखंब एंड स्पोर्ट्स एकेडमी, बल्कि पूरा बस्तर इलाका अउ छत्तीसगढ़ बर गर्व के बात हवय। ये आयोजन ह ‘बदलते बस्तर’ के ओ मजबूत तस्वीर ला देखाथे, जहाँ संघर्ष के भुइँया ले प्रतिभा के नवा सितारा मन निकलत हवय।
