अबूझमाड़ पीस हाफ मैराथन: शांति, विस्वास अउ विकास के संघरा दौड़
मुख्यमंत्री श्री विष्णुदेव साय ह नारायणपुर म अबूझमाड़ पीस हाफ मैराथन ल देखाइन हरी झंडी
10 हजार ले जादा प्रतिभागी मन लगाइन दौड़, आत्मसमर्पित नक्सली घलो बनिन आयोजन के हिस्सा
नारायणपुर, अबूझमाड़ के पावन धरती ले शांति, सद्भाव अउ विकास के सशक्त संदेस देवात आज अबूझमाड़ पीस हाफ मैराथन 2026 के भव्य अउ ऐतिहासिक आयोजन करे गीस। मुख्यमंत्री श्री विष्णुदेव साय ह आज बिहनिया नारायणपुर के हाईस्कूल परिसर के तीर आयोजित हाफ मैराथन म सामिल होइन अउ धावक मन ल हरी झंडी देखा के रवाना करिन अउ सांकेतिक रूप ले खुदे दौड़ लगाइन। ए दौरान मुख्यमंत्री ह जीतइया प्रतिभागी मन ल देहे जाए वाला मेडल के अनावरण घलो करिन।
मुख्यमंत्री श्री विष्णुदेव साय ह कहिन के आज अबूझमाड़ के धरती ले पूरा देस अउ दुनिया ल अमन अउ शांति के मजबूत संदेस देहे जात हे। उमन कहिन के ये उही अबूझमाड़ हरे, जिहाँ कभू आम नागरिक अउ जवान मन के पहुँचना घलो कठिन रहिस, फेर आज सकारात्मक वातावरण के कारण हजारों लोगन इहाँ जुरियाए हें। मुख्यमंत्री ह कहिन के बस्तर म माओवाद ले मुक्ति के दिशा म युवा वर्ग के जोस अउ उत्साह ये संकेत देवत हे के जल्दीच ये क्षेत्र खुसी ले आबाद होही।
मुख्यमंत्री श्री साय ह कहिन के ये बदलाव डबल इंजन सरकार के नीति अउ नेतृत्व के परिणाम हरे। उमन प्रधानमंत्री श्री नरेंद्र मोदी अउ केंद्रीय गृहमंत्री श्री अमित शाह के संकल्प अउ दृढ़ इच्छाशक्ति के उल्लेख करत कहिन के 31 मार्च 2026 तक देस ले नक्सलवाद के पूरा खात्मा के लक्ष्य तय करे गे हे अउ बस्तर लाल आतंक ले पूरा तरह मुक्त होही। उमन नक्सलवाद के विरुद्ध संघर्स म लगे सुरक्षा बल के अधिकारी अउ जवान मन के अदम्य साहस अउ पराक्रम ल नमन करत कहिन के उंखरे बलिदान अउ समर्पण ले आज बस्तर क्षेत्र म शांति अउ विकास के मजबूत नींव पड़े हे।
मुख्यमंत्री ह जानकारी दीन के हाल ही म बस्तर क्षेत्र म 351 करोड़ रूपिया के विकास काम के लोकार्पण अउ भूमिपूजन करे गे हे अउ नवा विकास काम के घोषणा घलो करे गे हे। उमन कहिन के नक्सलवाद के कारण ये क्षेत्र पाछू चार दसक ले विकास ले वंचित रहिस, फेर अब अइसन नइ होवय अउ बस्तर म विकास के गंगा सरलग बह ही। उमन पूरा बस्तर अउ छत्तीसगढ़ ल विकास के मुख्यधारा ले जोड़े के सरकार के संकल्प ल दोहराइन।
जानबा हे के ये 21 किलोमीटर लंबा हाफ मैराथन नारायणपुर ले बासिंग तक आयोजित करे गीस, जेमा देस-विदेस ले आए 60 ले जादा विदेसी प्रतिभागी मन सहित बस्तर संभाग, प्रदेश अउ आने राज्य के 10 हजार ले जादा धावक मन ह भाग लीन। मैराथन ले पहिली हाईस्कूल परिसर म जुंबा वॉर्मअप कार्यक्रम के आयोजन करे गीस, जेमा हजारों प्रतिभागी मन ह एक संग उत्साहपूर्वक भाग लीन।
आत्मसमर्पित माओवादी बनिन मैराथन के हिस्सा
ये आयोजन के सबले खास अउ ऐतिहासिक बात ये रहिस के आत्मसमर्पित माओवादी युवा मन ह घलो हथियार छोड़के शांति अउ मुख्यधारा म लवटे के संदेस देवात मैराथन म हिस्सा लीन। नारायणपुर के अबूझमाड़िया जनजाति सहित स्थानीय समुदाय के सक्रिय भागीदारी ह ये आयोजन ल अउ जादा प्रभावशाली अउ प्रेरणादायी बना दीस।
कार्यक्रम म वन अउ पर्यावरण मंत्री अउ क्षेत्रीय विधायक श्री केदार कश्यप, जिला के प्रभारी मंत्री श्री टंकराम वर्मा, बस्तर सांसद श्री महेश कश्यप, छत्तीसगढ़ राज्य लघु वनोपज संघ के अध्यक्ष श्री रूपसाय सलाम, वैद्यराज पद्मश्री श्री हेमचंद मांझी, मुख्यमंत्री के सचिव श्री राहुल भगत, बस्तर कमिश्नर श्री डोमन सिंह, आईजी श्री पी. सुंदरराज, कलेक्टर श्रीमती नम्रता जैन, पुलिस अधीक्षक श्री राबिनसन गुरिया, जिला सीईओ श्रीमती आकांक्षा शिक्षा खलखो सहित जनप्रतिनिधि, प्रशासनिक अधिकारी अउ भारी संख्या म नागरिक उपस्थित रहिन।
