रायपुर, प्रदेश के नारायणपुर जिला म 8 फरवरी के अबुझमाड पीस हाफ मैराथन दौड़ के आयोजन जिला प्रशासन के मार्गदर्शन म मैराथन आयोजन समिति कोति ले करे जात हे । ये 21 किलोमीटर के हाफ मैराथन दौड़ के आयोजन भिलाई इस्पात संयंत्र के सौजन्य ले जिला मुख्यालय नारायणपुर के हाई स्कूल मैदान ले करे जाही।
अबुझमाड़ रन फॉर पीस के आयोजन क्षेत्र म खेल सम्भावना ल मंच देहे के संगें-संग क्षेत्र म नक्सल गतिविधि मन के सेती मनखे मन के मन म बने खौफ ल घलोक हटाए के प्रयास हे। ये हाफ मैराथन के ये दूसरइया साल हे पउर साल एकर सफल आयोजन करे गए रहिस जेमां करीबन 5 हजार भाग लेवईया मन ह हिस्सा लेहे रहिन। पउर साल ये प्रतियोगिता के ल केन्या देश के धावक जीते रहिस। ये साल घलोक 4 हजार ले जादा मनखे मन ह प्रतियोगिता बर पंजीयन करवाए हें। प्रतियोगिता म पहिली पुरस्कार एक लाख एक्कीस हजार, दूसर 61 हजार, तीसर 31 हजार, चउथा 21 हजार, पांचवा 11 हजार रुपिया रखे गए हे संगेच नारायणपुर जिला के असली निवासी भाग लेवइया मन ल विशेष पुरस्कार देहे जाही।
हाफ मैराथन ल सफल बनाए अऊ जादा ले जादा के सहभागिता बर सोशल मीडिया के माध्यम ले जनप्रतिनिधि मन, अधिकारी-कर्मचारी मन संग नारायणपुर जिला के विद्यार्थी, लोक कलाकार, खिलाड़ी मन कोति ले रन फॉर पीस म सामिल होए के अपील करे जात हे।
