अंबिकापुर, 11 जून 2020। सरगुजा म एंटी करप्शन ब्यूरो (एसीबी) के टीम ह बीईओ कार्यालय म पदस्थ लेखापाल कर्मचारी ल 10 हजार रुपिया के रिश्वत लेवत रंगे हाथ पकड़ के गिरफ्तार करे हे. आरोपी कर्मचारी ह दिवंगत हेडमास्टर पिता के पेंशन दे बर बेटी ले रिश्वत के मांग करे रहिस. जेखर ले परेशान होके युवती ह एसीबी म शिकायत करिस.
एंटी करप्शन ब्यूरो के डीएसपी गौरव मंडल ले मिले जानकारी के अनुसार पीड़ित युवती ह एंटी करप्शन ब्यूरो कार्यालय अंबिकापुर म शिकायत दर्ज कराये रहिस. लुण्ड्रा स्थित बीईओ कार्यालय म पदस्थ लेखापाल पटेल राम राजवाडे युवती के दिवंगत पिता के पेंशन, जीपीएफ, ग्रेजुएटी अउ अवकाश नगदी जइसे राशि निकाले के नाम म 4 साल ले घूमात रहिस. अतना साल बीत जाये के बाद 10 हजार के रिश्वत लेके काम करे के आश्वासन दीस.
इही बेरा दिवंगत हेडमास्टर के बेटी ह एखर शिकायत एसीबी कार्यालय म कर दीस. गुरुवार के एंटी करप्शन कार्यालय अंबिकापुर के अधिकारी मन ह लेखापाल पटेल राम राजवाडे ल 10 हजार रुपिया रिश्वत लेवत रंगे हाथ गिरफ्तार कर लिस. आरोपी के खिलाफ ब्यूरो के अधिकारी भ्रष्टाचार अधिनियम के तहत अपराध दर्ज करे गे हे.
