बालोद, 20 नवम्बर 2020। खदान म नहाय बर गे एक युवक के पानी म डूबे ले मउत होगे। ग्राम पंचायत सीकोसा अंतर्गत लगभग पिछु 50 साल ले शासकीय भूमि म संचालित फर्शी पत्थर खदान म गांव के एक युवक नहाय ल गे रिहिस। पानी म डूब जाय ले ओखर मउत होगे। मिले जानकारी के अनुसार युवक गुरुवार बिहनिया 11 बजे खदान म नहाय बर गे रिहिस। संझा तक वापस नई आय म परिजन खदान पहुंचीन। युवक के चप्पल अउ कपड़ा नजर आइस। एखर ले परिजन मन ल शंका होइस कि कहीं युवक गहरा पानी म डूब तो नई गेहे। परिजन मन ह एखर सूचना पुलिस ल दीन। पुलिस टीम ह गोताखोर के मदद ले तलाशी शुरू करिन। युवक के शव खदान के गहरा भाग ले निकाले गिस।
गुरतुर गोठ बर- भीषम वर्मा
