31 कर्मचारी निलंबित, तीन झिन ऊपर एफआईआर, एक के सेवा समाप्ति
रायपुर, राज्य म खरीफ विपणन बछर 2025-26 म समर्थन मूल्य म करे जात धान खरीदी म गड़बड़ी करे के सेती समिति प्रबंधक अउ धान खरीदी ले जुड़े 38 कर्मचारी मन ऊपर कारवाही करे गए हे। एमा 31 कर्मचारी मन ल निलंबित, एक के सेवा समाप्ति, दू झिन ल सेवा ले अलग, एक ल काम ले अलग अउ तीन कर्मचारी मन के खिलाफ एफआईआर दर्ज कराए गए हे। ये कारवाही प्रदेश के 12 जिला दुर्ग, बेमेतरा, कबीरधाम, बिलासपुर, जांजगीर-चांपा, रायगढ़, सक्ती, जगदलपुर, रायपुर, गरियाबंद, महासमुंद अउ बलौदाबाजार-भाटापारा म करे गए हे।
खाद्य विभाग ले मिले जानकारी के मुताबिक धान खरीदी के काम के निरीक्षण अउ देखरेख म स्कंध म कमी के 5 मामला, स्टॉक जादा अउ अव्यवस्थित स्टेकिंग के 3 मामला, नीति के उल्टा काम-निर्देश के उल्लंघन के 4 मामला, अमानक धान खरीदी के 5 मामला, धान खरीदी म गड़बड़ी के 11 मामला, छुट्टी के दिन धान खरीदी के 3 मामला समेत फर्जी खरीदी, अनियमितता, टोकन गड़बड़ी, बिना आवक परची, अवैध वसूली, अव्यवस्था के एक-एक अउ बारदाना वितरण म गड़बड़ी के 2-2 मामला म कारवाही करे गए हे।
दुर्ग जिला म समर्थन मूल्य म धान खरीदी काम के भौतिक सत्यापन म स्टॉक म गड़बड़ी पाय जाय के सेती झीट धान उपार्जन केन्द्र के समिति प्रबंधक श्री सौरभ यादव अउ गोढ़ी के समिति प्रबंधक श्री शेखर सिंह कश्यप, खिलोराकला के समिति प्रभारी श्री देवदत पटेल, कन्हारपुर के समिति प्रभारी श्री सेवाराम पटेल, ठेंगाभाट के समिति प्रभारी श्री ईश्वर कुमार साहू, मुरमुंदा के समिति प्रभारी श्री टिकेन्द्र कुर्रे ल निलंबित करे गए हे। अइसने सेलूद के सहायक समिति प्रबंधक श्री रोमनदास वैष्णव अउ भृत्य श्री हरिशंकर साहू ल नीति के उल्टा काम अउ उल्लंघन के मामला म निलंबित करे गए हे।
बेमेतरा जिला म अमानक धान खरीदी के मामला म धान उपार्जन केन्द्र बोरतरा के प्रभारी सहायक प्रबंधक श्री टिकेश्वर निषाद, फड प्रभारी (लिपिक) श्री किशन जंघेल, गाडाडी धान उपार्जन केन्द्र के प्रभारी समिति प्रबंधक श्री भुनेश्वर वर्मा अउ फड प्रभारी श्री गेंदलाल वर्मा ल निलंबित करे गए हे। उहें मऊ के सहायक समिति प्रबंधक श्री उमेश कुमार साहू के खिलाफ फर्जी धान खरीदी के मामला म निलंबित अउ एफआईआर के कारवाही करे गए हे। कबीरधाम जिला म धान उपार्जन केन्द्र कुकदूर के समिति प्रबंधक श्री अनिल बाजपेयी के खिलाफ भौतिक सत्यापन म स्टॉक म कमी पाय जाय के कारण निलंबन के संग-संग एफआईआर दर्ज करे गए हे। बारदाना वितरण म गड़बड़ी के कारण चपोरा उपार्जन केन्द्र प्रभारी श्री नरेश यादव ल निलंबित करे गए हे।
बिलासपुर जिला के धान उपार्जन केन्द्र पीपरतराई के प्रभारी श्री तेजुराम ल खराब धान खरीदी के मामला म निलंबित करे गए हे। उहें धान खरीदी केन्द्र एरमसाही के प्रभारी श्री कामीराम खुंटे के खिलाफ 920 बोरा के कमी पाय जाय म एफआईआर दर्ज कराय गए हे। जांजगीर-चांपा जिला म धान खरीदी केन्द्र बोड़सरा के भृत्य श्री हरिहर यादव, कम्प्यूटर ऑपरेटर श्री अमित कुमार तिवारी, चौकीदार श्री निरंजन साहू ल छुट्टी के दिन आवक लेय के सेती निलंबित कर दे गए हे। धान उपार्जन केन्द्र कोसमंदा के कम्प्यूटर ऑपरेटर श्री छविलाल मन्नेवार ल टोकन म गड़बड़ी के कारण निलंबित करे गए हे।
रायगढ़ जिला म धान खरीदी म गड़बड़ी के सेती मुकडेगा के सहायक समिति प्रबंधक श्री तेलूराम सिदार, कोडसिया के सहायक समिति प्रबंधक श्री प्रहलाद बेहरा, छाल के सहायक समिति प्रबंधक श्री ठंडाराम बेहरा अउ जमरगीडीह के सहायक समिति प्रबंधक श्री कृपाराम राठिया ल निलंबित करे गए हे। सक्ती जिला के धान उपार्जन केन्द्र कांसा के प्रभारी श्री एकलव्य चंद्राकर ल बिना आवक परची धान खरीदी के मामला म सेवा ले अलग कर दे गए हे। जगदलपुर जिला म कोलचूर प्रभारी समिति प्रबंधक श्री गौतम तिवारी अउ रेटावण्ड के प्रभारी समिति प्रबंधक श्री दीनबंधु पाणीग्रही ल धान खरीदी म गड़बड़ी के सेती निलंबित करे गए हे। रायपुर जिला म नरदहरा के लिपिक-ऑपरेटर श्री राकेश जांगड़े ल किसान मन ले अवैध वसूली के मामला म सेवा समाप्ति के कारवाही करे गए हे।
गरियाबंद जिला म धान खरीदी म लापरवाही अउ गड़बड़ी बर लोहरसी के कर्मचारी श्री संतोष कुमार साहू, मैनपुर के श्री गोपी राम मरकाम ल निलंबित अउ शोभा के श्री भीखम मरकाम ल काम ले अलग करे गए हे। महासमुंद जिला म धान खरीदी म गड़बड़ी के मामला म पिरदा के उपार्जन केन्द्र प्रभारी श्री रोहित पटेल अउ सिंगबहाल के उपार्जन केन्द्र प्रभारी श्री बुध्दिवंत प्रधान के खिलाफ एफआईआर दर्ज कराय गए हे। संग म धान खरीदी म अव्यवस्था के कारण तोषगांव के उपार्जन केन्द्र प्रभारी श्री नकुल साहू ल निलंबित करे गए हे।
बलौदाबाजार-भाटापारा जिला म धान खरीदी केन्द्र सकरी के प्रभारी समिति प्रबंधक श्री सतीष कुमार महिलांग द्वारा नीति के उल्टा काम करे के सेती निलंबित करे गए हे अउ बारदाना प्रभारी कुमारी थानेश्वरी साहू ल नीति के उल्टा काम करे के सेती सेवा ले अलग करे गए हे। करमदा के प्रभारी समिति प्रबंधक श्री राजकमल साहू ल धान स्टॉक म कमी पाय जाय के सेती निलंबित करे गए हे।
