सक्ती ब्लॉक के मेसर्स किसान बीज भंडार म करे गीस कार्रवाई
सक्ती, 22 जुलाई 2024। कलेक्टर अउ जिला दंडाधिकारी श्री अमृत विकास तोपनो कोति ले कृषि विभाग ल जिला म अमानक, नकली खाद, दवा, बीज आदि के सघन जांच करके नियामानुसार कड़ा कार्यवाही करे के हुकुम देहे गए हे। हुकुम के परिपालन म उप संचालक कृषि के अगुवई म जिला स्तरीय निरीक्षण दल ह सक्ती ब्लाक स्थित मेसर्स किसान बीज भण्डार सक्ती के उदुपहा जांच करिस।
उप संचालक कृषि श्री शशांक शिंदे ले मिले जानकारी के मुताबिक जांच के समय ये प्रतिष्ठान के बीज, दवा अउ खाद आदान चीज मन के जांच करे गीस। जांच म व्यापारी तीर लायसेंस म बिना स्त्रोत प्रमाण पत्र जुडवाये आन कम्पनी मन के दवा भण्डारित पाये गीस अउ तीन कम्पनी मन के कालातित हो गे दवा मन के भण्डारन पाए गीस ते पाए के कीटनाशक अधिनियम के मुताबिक 21 दिन के विक्रय प्रतिबंध आदेश जारी करे गीस।
कलेक्टर के हुकुम म जिला के किसान मन ल गुणवत्तायुक्त खाद, बीज अउ दवा मिलय, एखर बर जिला स्तरीय निरीक्षण दल ह सरलग जांच चालू करे हे। इही कड़ी म जिला स्तरीय निरीक्षण दल ह विकासखण्ड सक्ती के अंतर्गत मेसर्स किसान बीज भण्डार म उदुपहा जांच करीस। जांच के समय कीटनाशक लायसेंस के मूलप्रति उचित स्थान म नइ प्रदर्शित करे गीस अउ बेचइया कोति ले भण्डारित स्टॉक अउ प्राप्ति बिल म भिन्नता पाए गीस, जेन संबंध म बेचइया ल 07 दिन के भीतर उचित कागद संग स्पष्टीकरण प्रस्तुत करे बर अदेस जारी करे गीस।
