स्व-सहायता समूह मन के मेहनत म रंग भरत हे बिहान बाजार

माटी के दीया संग कई ठन उत्पाद मन के बिक्री खातिर लगाए जात हे अलग-अलग स्टॉल
बलरामपुर, देवारी के तिहार नजदीक आतेच शहरी अऊ ग्रामीण क्षेत्र मन म स्व-सहायता समूह के महिला मन माटी के दीया बनाके आत्मनिर्भरता के मिसाल पेश करत हें। संगेच समूह के महिला मन आजिविका खातिर कई ठन उत्पाद जइसे रंगोली, बांस ले निर्मित समान संग आन हस्त निर्मित उत्पाद तैयार करके बजार म बेचे ल लावत हें। प्रशासन के पहल ले रजत जयंती के अवसर म ए उत्पाद मन ल स्थानीय बाजार उपलब्ध कराए के व्यवस्था घलोक करे जात हे।
समूह मन के संग 5500 ले जादा माटी के दीया तैयार
बलरामपुर जिला के जिगड़ी ग्राम पंचायत म सक्रिय महिला स्व-सहायता समूह ह ए पइत लगभग 5500 ले जादा माटी के दीया तियार करे हें। पहिली ये महिला मन केवल घरेलू उपयोग खातिर दीया बनात रहिन, फेर अब जिला प्रशासन अऊ ग्रामीण आजीविका मिशन के सहयोग ले ए मन ल व्यावसायिक रूप देहे गए हे। राजपुर के जय मां अम्बे स्व-सहायता समूह अऊ बलरामपुर के ज्योति समूह के दीदि मन दिन-रात लगन ले दीया तैयार करत हे। ए दुनों समूह म 10-10 दीदि मन सामिल हे। समूह के अध्यक्ष श्रीमती सलिता गुप्ता बताथे के पहिली दीपावली म बाहिर ले दीया खरीदत रहेन, अब हम खुद बनावत हन अऊ बेचत घलो हन, ये ह हमार बर आत्मनिर्भर बने के नवा रद्दा मिले हे।