रइपुर, 28 मई 2021 शुकवार। मुख्यमंत्री दाउ भूपेश बघेल ह सुकमा जिला के विकास ल अपन प्राथमिकता सूची म सबले ऊपर रखे हे, इही सेति पाछू अढ़ई बछर म ये जिला के विकास नवा नजरिया के संग करे जावत हे। स्थानीय लोगन के आसरा, उन्कर जरूरत, समस्या अउ चुनौती मन के आंकलन करके जिला के विकास के रणनीति नवा सिरा ले तियार करे गे हवय, जेमा उन्कर भागीदारी सुनिश्चित करे गे हवय। अब इहां के गांव मन म ग्रामीण खुशहाल, स्वस्थ अउ शिक्षित जीवन जीयत हे। जिला म जिहाँ पाछू अढ़ई बछर म कुपोषण के दर म कमी आये हे त उहेंचे शिक्षा के स्तर म बढ़ोतरी होय हे अउ स्वास्थ्य सुविधा मन म सुधार होय हे।
फेर खुलिस बंद पड़े स्कूल, गांव-गांव तक पहुंचत हे शिक्षा
जिला म बन्द पड़े स्कूल मन के फेर संचालन ले अन्दरूनी गांव के बच्चा मन गृह ग्राम के नजीक शिक्षा पाए के अवसर मिलत हे। बछर 2006 म नक्सलवादी मन के सेति विकासखण्ड कोंटा के 102 प्राथमिक अउ 21 माध्यमिक शाला ल बंद करे बर परगे रिहिसे या दूसर जगा संचालित करे बर परत रिहिसे। वर्तमान म अइसन 92 स्कूल मन ल फेर संचालित करे जावत हे जेमा 4 हजार 172 विधार्थी अध्यनरत हवय। संबंधित पंचायत के स्थानीय 12वीं उत्तीर्ण युवक-युवती मन ल पंचायत के प्रस्ताव के आधार म स्कूल मन म शिक्षादूत के रूप म नियुक्त करे गे हे। पहिली शाला के संचालन स्थानीय स्तर म बनाए झोपड़ी मन होवय । अभीन शासन अउ प्रशासन स्तर म 60 शाला भवन अउ 34 अतिरिक्त कक्ष निर्माण के स्वीकृति प्रदान करके भवन के निर्माण करे जावत हे। शाला मन म शासन कोति ले अबड़ अकन योजना, जइसे मध्यान्ह भोजन, निःशुल्क पाठ्य-पुस्तक, गणवेश आदि के लाभ विद्यार्थी मन ल मिलत हावय।
सुपोषण अभियान ले संवरत हे बच्चा मन के सेहत
छत्तीसगढ़ शासन कोति ले मुख्यमंत्री सुपोषण अभियान बछर 2019 ले प्रारंभ हे। बछर 2019 के वजन तिहार म जिला म कुपोषण के दर 45 प्रतिशत रिहिसे, ये कार्यक्रम के बदौलत बीते दूये बछर म कुपोषण के दर म 9 प्रतिशत के गिरावट आये हे। जिला म वर्तमान स्थिति म कुल 963 आंगनबाड़ी केन्द्र संचालित हे, जेमा 665 केन्द्र आंगनबाड़ी भवनों म संचालित करे जावत हे अउ 200 आंगनबाड़ी केन्द्र निर्माणाधीन हे।
बने होइस स्वास्थ्य सुविधा
सुकमा जिला म समय के संग स्वास्थ्य सुविधा के विस्तार होए ले अब लोगन ल बने स्वास्थ्य सुविधा मिले लगे हे। कोण्टा विकासखण्ड म आज कुल 1446 मितानिन मन के माध्यम ले दुर्गम क्षेत्र मन म स्वास्थ्य सुविधा पहुंचत हावय। बछर 2018 म जिहां 70.3 प्रतिशत प्रसव अस्पताल अउ चिकित्सा केन्द्र मन करे गे रिहिसे वोह बाढ़के 2020-21 म 91.6 प्रतिशत हो गे हे। बीते अढ़ई बछर म जिला म कुल 10 नवीन उप स्वास्थ्य केन्द्र व 1 प्राथमिक स्वास्थ्य केन्द्र के निर्माण कार्य पूर्ण होग हे अउ कुल 13 प्राथमिक स्वास्थ्य केन्द्र अउ 89 उप स्वास्थ्य केन्द्र संचालित हवय, जेकर ले अल्प समे म ग्रामीण मन के छोटे— मोटे स्वास्थ्यगत परेशानी मन के निदान नजदीके म हो जथे।
जिले म मलेरिया के प्रकोप म प्रभावी नियंत्रण हासिल करे गे हवय। 2018 म जिहां 11 हजार 698 लोगन मलेरिया संक्रमित पाए गे रिहिसे, अब ये आंकड़ा घटके केवल 1612 तक सिमट गे हवय। आज के स्थिति म पाजीटीविटी दर 17 प्रतिशत ले घटके केवल 8.9 प्रतिशत रहि गे हवय ।
