छत्तीसगढ़ विधानसभा के विशेष सत्र म राज्यपाल सुश्री उइके दीन अभिभाषण
रायपुर, राज्यपाल सुश्री अनुसुईया उइके ह आज छत्तीसगढ़ राज्य के पांचवा विधानसभा के नवा बछर 2020 म आयोजित पहिली सत्र के बेरा म कहिन कि छत्तीसगढ़ विधानसभा ह कमती समय म अपन सुग्घर काम ले जऊन गौरवशाली परम्परा स्थापित करे हे, वो ये विधानसभा के इतिहास म सोनहा पाना के रूप म दरज हो गए हे। उमन कहिन कि आज ये विधानसभा म मैं पहिली पइत आए हंव, जेकर सुखद अनुभूति मोला भावुक घलोक करत हे अऊ एक नवा ऊर्जा ले ऊर्जित घलोक करत हे। राज्यपाल ह कहिन कि मोला विश्वास हे कि हम सब मिलके छत्तीसगढ़ विधानसभा के कीर्ति-पताका ल ऊंचा करे म सफल होबोन। उमन कहिन कि आप मन सब प्रदेश के जनता के संउख के मुताबिक नवा छत्तीसगढ़ गढ़े म अपन योगदान पूरा मनोयोग ले दव, एखर बर मोर शुभकामना।
राज्यपाल सुश्री उइके ह कहिन कि मोर लिए बर ये अड़बड़ खुसी अऊ गौरव के विसय हे कि नवा साल म छत्तीसगढ़ विधानसभा के कार्यकलाप मन के शुरूआत एक विशेष अवसर के रूप म होवत हे, जेखर से हमला भारत के महान अऊ पावन संविधान के प्रति अगाध निष्ठा, प्रतिबद्धता प्रदर्शित करे के अवसर मिले हे। एखर से हमला संविधान के प्रति अपन कर्तव्य निभाए के अवसर मिले हे। भारतीय संविधान म अनुसूचित जाति अऊ अनुसूचित जनजाति बर आरक्षण के समय-सीमा बढ़ाए जाय बर जऊन निरधारित प्रक्रिया हे, ओला पूरा करे म आप मन के भागीदारी दर्ज होना, निश्चय ही बड़ सौभाग्य के विसय हे।
राज्यपाल ह कहिन कि मोला ये कहत बहुत प्रसन्नता के अनुभव होवत हे कि मोर सरकार ह छत्तीसगढ़ म अनुसूचित जाति अउ अनुसूचित जनजाति वर्ग ल बेहतर जिन्दगी के अंजोर दिए हे। ए वर्ग के प्रति संवेदनशीलता अऊ ए मन ल संविधान प्रदत्त अधिकार मन ले सशक्त बनाए के प्रतिबद्धता ह मोर सरकार के प्रति विश्वास के एक नवा युग के शुरूआत करे हे। उमन कहिन कि मोला विश्वास हे कि छत्तीसगढ़ विधानसभा अपन परम्परा के मुताबिक लोकतंत्र ल अऊ जादा मजबूत बनाए के चुनौती स्वीकार करही। राज्यपाल ह कहिन कि आप मन सबके सक्रियता अऊ योगदान ले ही लोकतंत्र के ये मंदिर जनता जनार्दन के आकांक्षा मन ल पूरा करे म सफल होही।
