अधिकारी, जनप्रतिनिधि बने तालमेल ले करैं बूता : राजस्व मंत्री श्री जयसिंह अग्रवाल

रइपुर, 5 अगस्त 2021 बिरस्पत। राजस्व अउ आपदा प्रबंधन मंत्री श्री जयसिंह अग्रवाल के अगुवई म आज गौरेला पेंड्रा मरवाही जिला के कलेक्ट्रेट परिसर अरपा सभाकक्ष म जिला खनिज संस्थान न्यास के अंतर्गत बछर 2021-22 के कार्य योजना बर बैठका सम्पन्न होइस। बैठका म मंत्री श्री अग्रवाल ह प्राथमिकता क्षेत्रवार बछर 2020-21 म स्वीकृत बूता मन के अद्यतन स्थिति के जानकारी लीन। राजस्व मंत्री कोति ले उपस्थित अबड़ झिन जनप्रतिनिधि अउ अधिकारी मन ले जिला के बने विकास बर उन्कर सुझाव तको लिए गइस। बैठका म वीडियो कॉन्फ्रेंसिंग के माध्यम ले संघरे कोरबा सांसद श्रीमती ज्योत्सना चरणदास महंत ह वर्तमान म कोरोना के तीसरइया संभावित लहर ल देखत जिला खनिज संस्थान न्यास मद के स्वास्थ्य अउ शिक्षा के क्षेत्र म जादा ले जादा उपयोग करे बर कहीन ।
जिला के कलेक्टर सुश्री नम्रता गांधी कोति ले जिला के अबड़ कन आनी—बानी विकास बूता मन के जानकारी बैठका म देहे गईस। प्रभारी मंत्री श्री अग्रवाल ह जिला खनिज संस्थान न्यास मद म जरूरी बूता मन ल प्राथमिकता देवत वोमे बूता करे बर कहीन। बैठका म मरवाही विधायक डॉ. के.के. ध्रुव, जिला पंचायत बिलासपुर के अध्यक्ष श्री अरुण सिंह चौहान संग अबड़ झिन जनप्रतिनिधि, पुलिस अधीक्षक श्री त्रिलोक बंसल संग अबड़ अकन विभाग के जिला स्तरीय अधिकारीगण उपस्थित रिहिन।