कलेक्टर ह खुदे क्षेत्र के दौरा करके स्थिति के लीन जायजा, क्षतिग्रस्त मकान के रहवासी मन के अस्थाई बसेरा अब छात्रावास मन म, भोजन संग मुहैया होही आन सबो जरूरत के समान
सूरजपुर, 27 अप्रैल 2020। आपदा प्रभावित क्षेत्र मन म होए क्षति के आकलन कार्य अउ प्रभाव ले संबंधित पहलु मन ले अवगत होए बर कलेक्टर श्री दीपक सोनी ह ग्राम भवराही संग आन क्षेत्र मन म पैदल चलके प्रभावित गांव वाले मन ले मुलाकात करके आपदा के जायजा लीन। उमन गांव वाले मन ल कहिन के चिंता झन करव, हर स्थिति जिला प्रशासन जिला के जनता के संग खड़े हे। उमन आपदा ले होए क्षति बर राजस्व अउ कृषि विभाग के संयुक्त टीम ल आकलन ले संबंधित प्रकरण जल्दी ले जल्दी तियार करके भेजे के हुकुम दीन। ग्राम भवराही के 06 अइसे परिवार जिंकर मकान क्षतिग्रस्त हो गए हे। ओ मन ल सुरक्षित आश्रय स्थल बतौर शिवप्रसादनगर म संचालित छात्रावास म रहे के संग अभी हाल म कोरोना वायरस संक्रमण ले बचाव बर सुरक्षा मानक के पालन करत सबो प्रकार के सुविधा देहे बर तहसीलदार ल हुकुम दीन। उमन गांव वाले मन ल भरोसा देवाइन के ये संकट के घड़ी म कोनो प्रकार ले परेशान या चिंतित झन होवव। एकर से गांव के प्रभावित मन के मनोबल तको बाढि़स अउ अइसन बेरा म सहज रूप म गांव वाले मन संग मिले म गांव वाले मन के मन म आशा के संचार होइस।
जानबा हे के बीते सनिच्चर मौसम म बदलाव के संग आंधी तुफान अउ ओलावृष्टि ले फसल अउ घर मन ल नुकसान होए हे। राज्य शासन के संग जिला प्रशासन ह एला गंभीरता से लेवत मानवीय संवेदना ल प्राथमिकता देवत काली बिहनिया ले ही ग्रामवार राजस्व अउ कृषि विभाग के संयुक्त टीम ल तुरंते क्षतिपूर्ति के आकलन करके रिपोट तियार करे के दिशा निर्देश कलेक्टर श्री दीपक सोनी ह जारी करिन।
