पढ़ना-लिखना अभियान के तहत साक्षरता मुहल्ला क्लास म उर्मिला ह जानिस हिंदी के क ख ग
कोरिया, पढ़ई-लिखई अऊ अक्षर ज्ञान पढ़े ले वंचित रहे 40 साल के उर्मिला के पढ़े के इच्छा ल पढ़ना लिखना अभियान के तहत संचालित साक्षरता मुहल्ला कक्षा ह पूरा करे हे। विकासखंड मनेन्द्रगढ़ के ग्राम पंचायत ताराबहरा के ग्राम पतेराटोला के उर्मिला ह साक्षरता केंद्र पतेराटोला म अध्ययन करिस। 40 साल के उमर म अपन मेहनत ले वो ह अक्षर ज्ञान हासिल करिस। उर्मिला बताथे कि परिवारिक परिस्थिति ह कभू पढ़ई-लिखई कोति बढ़ेच नइ दीस, फेर अब साक्षरता मुहल्ला कक्षा म मोला पढ़ना-लिखना अच्छा लागिस अऊ उहां रोज नवा सीखे ल मिलीस। कक्षा के वॉलेंटियर श्रीमति उषा बताइस कि उर्मिला नियमित रूप ले कक्षा म आवय अऊ नवा-नवा सवाल ले कुछ नवा जाने के हमेशा कोसिस करय। उर्मिला के लगन देखके कक्षा म उपस्थित बाकी मनखे घलोक प्रोत्साहित होत रहिन। उर्मिला ह अपन मेहनत अऊ साक्षर बने के ललक ल बनाये रखिस अऊ अब ओ ह लिखत घलोक हे अऊ पढ़त घलोक हे।
पढ़ना-लिखना अभियान असाक्षर मन ल साक्षर बनाए के प्रयास हे। अभियान के अंतर्गत बीते 30 सितमबर के प्रौढ़ शिक्षार्थी के आंकलन बर महापरीक्षा के आयोजन करे गीस। जेमां कुल 175 केंद्र के माध्यम ले कुल 7 हजार 289 शिक्षार्थी सामिल होइन। जेमां 5 हजार 673 महिला, 1 हजार 615 पुरूष अऊ 1 तीसर लिंग शिक्षार्थी सामिल होइन।
प्रौढ़ शिक्षार्थी आंकलन परीक्षा ह अपन आप मन म अनूठा मिसाल कायम करे हे। जिहां ट्रांसजेंडर महिला श्रीमती रूनिया ह परीक्षा दिलाईस। त उहें प्राथमिक शाला चिउटीमार म श्रीमती अनारकली अपन बेटी सुश्री कुसुमकली अऊ पुत्रवधु श्रीमती गोदकुंवर के संग परीक्षा म सामिल होइस। आंकलन केन्द्र छापरपारा म श्रीमती सुनीता ह अपन लइका के संग परीक्षा देवाईस अऊ नगर पालिका बैकुण्ठपुर के प्राथमिक शाला चेर म दिव्यांग श्री विजय ह परीक्षा म सामिल होइस।
अक्षर अक्षर जोड़के 40 साल के उर्मिला ह पहिली सीखिस अपन नाम, फेर गांव लिखना
