बलौदाबाजार, मुख्यमंत्री के सलाहकार श्री प्रदीप शर्मा ह आज कसडोल विकासखण्ड के ग्राम खर्वे म बने गौठान के जांच करिन। राज्य सरकार के नरवा, गरूवा, घुरूवा अउ बाड़ी योजना के तहत खर्वे म आदर्श गौठान के निर्माण करे गए हे। उमन गौठान म पशु मन ल खवाए बर हर गौठान करीबन 500 ट्राली पैरा सकेले के हुकुम दीन। उमन कहिन कि अभी पैरा सकेले के समय हे। अवइया पंद्रही के भीतर किसान मन ल पैरादान बर प्रोत्साहित करके गौठान म पैरा जोरे के हुकुम उमन कर्मचारी मन देहे हें। उमन गौठान म सकलाए समिति के सदस्य, महिला स्वसहायता समूह अउ विभागीय अधिकारी मन ले चर्चा करके गौठान के गतिविधि मन के जानकारी लीन।
मुख्यमंत्री के सलाहकार श्री शर्मा ह गौठान म निरधारित 9 बिन्दु के अंतर्गत निर्माण संरचना मन ल पूरा करे के तको हुकुम दीन। ग्राम म उद्यानिकी विभाग के माध्यम ले बाड़ी के काम म लगे परिवार ल उन्नत बीज देहे के तको हुकुम दीन। पशु चिकित्सा विभाग कोति ले पशु टीकाकरण के जानकारी लीन गयी अऊ उन्नत नस्ल के दू सांड गौठान म रखे ल कहिन। स्वसहायता समूह के महिला मन कोति ले गौठान स्थल म करे जात वर्मी कम्पोस्टिंग काम के तको उमन जांच करिन। खाद के गुणवत्ता अउ वर्मी बेड म वर्मी के मात्रा ल जब उमन कम पाइन त नाराजगी व्यक्त करिन। उमन कहिन कि मैं पंद्रही म फेर लहुटहूं, तब इहां मिले कमी दूर हो जाना चाहिये।
ये बेरा म जिला पंचायत के अकतहा मुख्य कार्यपालन अधिकारी श्री एच.एस.चैहान, ग्राम पंचायत सरपंच श्री दिलहरण जायसवाल संग जिला पंचायत अउ जनपद स्तरीय विभागीय स्टाफ के संग अऊ आन ग्रामीणजन अउ महिला मन उपस्थित रहिन।