- मुख्यमंत्री ह उद्योगपति मन ले चर्चा करके जानिन उद्योग मन के समस्या
- समाधान बर हर संभव सहयोग करे दीन आश्वासन
- छत्तीसगढ़ इंडस्ट्रियल हब बनय, स्थानीय मनखे मन ल रोजगार अऊ राज्य सरकार ल उद्योग ले मिले राजस्व
- उद्योगपति मन ह कहिन: नवा सरकार बने के बाद प्रदेश म बनिस सुग्घर औद्योगिक वातावरण
रायपुर, 04 जून 2020। मुख्यमंत्री श्री भूपेश बघेल ह लॉक डाउन के बाद प्रदेश म शुरू होए उद्योग मन म कोरोना संक्रमण ले बचाव के गाईड लाइन संग सबो एहतियाती उपाय मन के गंभीरता ले पालन करे के जरूरत उपर बल देहे हें। श्री बघेल काली अपन निवास कार्यालय म आयोजित बैठक म उद्योगपति मन ले चर्चा करत रहिन। मुख्यमंत्री ह कहिन कि लॉक डाउन के 60 ले 70 दिन बाद औद्योगिक गतिविधि सुरू होए हे, अइसन म ये जरूरी हे कि उद्योग मन म काम करइया संक्रमण ले सुरक्षित रहयं। काम करइया के स्वास्थ्य के जांच संग गाइड लाइन के पालन करे जाए अऊ स्थानीय उद्योग मन म काम करइया मनखे मन ल बाहिर ले अवइया मनखे मन के सम्पर्क ले दूर रखे जाय।
