राजनांदगांव, 30 सितंबर 2020। छत्तीसगढ़ म राजस्व अऊ कृषि विभाग कोति ले किसान मन के खेत मन म मौका म पहुंचके फसल के गिरदावरी के काम कर ओखर प्रकाशन ग्राम पंचायत मन म करके ओ म दावा आपत्ति लेके वोखर निराकरण के काम करे जात हे। इही कड़ी म राजनांदगांव के कलेक्टर श्री टोपेशवर वर्मा ह जिला अधिकारी मन ल गिरदावरी के प्रारंभिक प्रकाशन होए के बाद प्राप्त दावा आपत्ति मन के परीक्षण करके निराकरण जल्द से जल्द करे के निर्देश देहे हें। उमन कहिन हें के धान खरीदी बर नवा किसान मन के वेरीफिकेशन करके उंखर पंजीयन करव। उमन कहिन के धान खरीदी बर तैयारी पहिलीच ले चालू कर ले जाय।
सबो सोसायटी म बारदाना के उपलब्धता अऊ रख रखाव के व्यवस्था होवय। जिला के अधिकांश विकासखंड अंतर्राज्यीय सीमा ले लगे हे। अइसन स्थिति म दूसर राज्य मन ले कोचिया के माध्यम ले इहां धान लाय के संभावना बने रहिथे। सबो अधिकारी सीमा ले लगे गांव मन म मुखबिर रखव अऊ ए गांव के धान खरीदी केन्द्र म अकटूबर महीना ले ही मॉनिटरिंग चालू करव। फसल कटाई चालू होतेच अंतर्राज्यीय सीमा चेकपोस्ट म जांच के कार्रवाई शुरू करव। कलेक्टर श्री वर्मा ह कहिन के मजदूर मन बर मनरेगा के तहत स्वीकृत काम चालू करव। गौठान मन म शेड निर्माण अऊ आन काम करे जाए जेखर से मनखे मन ल रोजगार मिल सकय। उमन कहिन के सबो एसडीएम नवरात्रि के संबंध म स्थानीय स्तर म बैठक लेके कोरोना प्रोटोकॉल के बारे म जानकारी देवव अऊ शासन कोति ले जारी दिशा-निर्देश के पालन करे बर निर्देशित करव।