मुख्यमंत्री श्री विष्णु देव साय गुरू पूर्णिमा के अवसर म रायगढ़ जिला के ग्राम बनोरा स्थित अघोर गुरू पीठ म गुरू दर्शन बर पहुंचिन

आध्यात्मिक मूल्य मन अउ संस्कार के पाठशाला हे Aghor Guru Peeth Brahmanishthalaya Banora

रायपुर, 21 जुलाई 2024। मुख्यमंत्री श्री विष्णु देव साय आज गुरू पूर्णिमा के अवसर म रायगढ़ प्रवास के समय ग्राम बनोरा स्थित अघोर गुरू पीठ म गुरू दर्शन बर पहुंचिन। उमन गुरू पीठ आश्रम के उपासना स्थल म अघोरेश्वर अवधूत भगवान राम जी के प्रतिमा के दर्शन करके प्रदेश के सुख, समृद्धि अऊ खुशहाली के कामना करिन। उमन आश्रम म अघोरेश्वर अवधूत भगवान राम जी के प्रिय शिष्य प्रियदर्शी भगवान राम जी के दर्शन घलोक करिन अऊ मार्गदर्शन लीन। एखर संगेच ए बेरा म मुख्यमंत्री श्री विष्णुदेव साय ह परिसर म करंज के पौधा, वित्त मंत्री श्री ओ. पी. चौधरी ह नीम के पौधा अउ पूर्व विधायक श्री  विजय अग्रवाल संग आन जनप्रतिनिधि मन घलोक पौधरोपण करिन। आध्यात्मिक मूल्य मन अउ संस्कार के पाठशाला के रूप म अघोर गुरू पीठ ब्रह्मनिष्ठालय बनोरा के नाम विख्यात हे। ए बेरा म म बहुत अकन जनप्रतिनिधि, कलेक्टर श्री कार्तिकेय गोयल संग गणमान्य नागरिक उपस्थित रहिन।

छत्तीसगढ़ म अघोर पंथ के बीजारोपण करइया पूज्य अघोरेश्वर के शिष्य बाबा प्रियदर्शी राम जी के कर कमल ले तीन दशक पहिली रायगढ़ के पूर्वांचल स्थित ग्राम बनोरा म ए ट्रस्ट के नींव रखे गए रहिस तब ले लेके आज तक ये ट्रस्ट राष्ट्र निर्माण म अपन अहम भूमिका निभावत हे। आध्यात्मिक मूल्य अउ संस्कार ल बढ़ावा देहे बर अघोर गुरू पीठ ट्रस्ट बनोरा के स्थापना तीन दशक पहिली करे गए रहिस। अघोरेश्वर महाप्रभु ह समाज के विकास के अवधारणा के सूत्रपात करे गीस लेकिन ए दिशा म बहुत अकन अधूरा काम मन ल पूरा करे अघोरेश्वर अवधूत  भगवान राम जी के प्रियतम शिष्य बाबा प्रियदर्शी राम जी ह बनोरा ले जुड़े आन शाखा मन के शिवरीनारायण, डभरा, चिरमिरी, अंबिकापुर संग आन प्रांत म घलोक विस्तार करिन। बनोरा ले जुड़े सबो शाखा मन म मानव सेवी गतिविधि सरलग संचालित होवत हे। बनोरा ट्रस्ट ले जुड़े सबो शाखा मन आसपास क्षेत्र के मौजूद जरूरतमंद अऊ बेसहारा मनखे मन ल जीवन के मूलभूत जरूरत शिक्षा, चिकित्सा या आध्यात्मिक मूल्य मन के शिक्षा देके समाज कल्याण बर क्षेत्र म अहम भूमिका निभावत हे।