कोरबा, 21 अक्टूबर 2020। गांव अऊ छोटे कस्बा मन के लइका मन बर डाक्टर-इंजीनियर बने बर तैयारी करना एक सपना जइसे लागथे। डाक्टर-इंजीनियर बने के तैयारी बर बड़े शहर अऊ महंगा कोचिंग संस्थान म रहिके तैयारी करना परथे। महंगा कोचिंग संस्थान मन के फीस भरना गरीब हालत वाले लइका मन बर नामुमकिन जइसे लागथे। कोरबा जिला प्रशासन अइसने गरीब, मेधावी लइका मन के डाक्टर-इंजीनियर बने के सपना ल साकार करत हे। जिला प्रशासन कोति ले संचालित अग्रगमन कोचिंग योजना म ये साल नीट परीक्षा के तैयारी करइया बैच म कुमारी रंजीता बिंझवार ह पहिली स्थान हासिल करे हे। देश के सर्वोच्च मेडिकल प्रवेश परीक्षा नीट ल रंजीता ह 385 अंक के संग क्वालीफाई करे हे। रंजीता डाक्टर बनके समाज अऊ देश के सेवा करना चाहत हे। नीट क्वालीफाई होए के बाद रंजीता ह अपन सफलता के श्रेय जिला प्रशासन के अग्रगमन कोचिंग ल देहे हे। वोकर बताती अग्रगमन म रहिके पढ़ाई करे ले ही मोला कामयाबी मिल पाए हे। रंजीता ह बताइस के गांव के लइका मन बर उच्च स्तर के परीक्षा के तैयारी करना चुनौती वाला अऊ कठिन रहिथे। अग्रगमन के शिक्षक मन जउन सही शिक्षा अऊ सरलग पढ़ई करईन तेकरे बदौलत नीट परीक्षा क्वालीफाई होए म सफलता मिलीस। रंजीता ह बताइस के अग्रगमन म मुफ्त म रहे, खाए-पीए के संग पढ़ाई के अच्छा माहौल घलोक प्रदान करे जात हे। रंजीता ह अग्रगमन के शिक्षक मन के लगातार पढ़ईया लईका मन ल परीक्षा बर प्रोत्साहित करइ ल घलोक नीट परीक्षा म कामयाबी के कारण बताइस।
विकासखंड कटघोरा के ग्राम मनगांव निवासी नीट परीक्षा म अग्रगमन ले 28 क्वालीफाईड लइका मन म पहला स्थान प्राप्त करइया रंजीता बिंझवार ह बताइस के वोखर तीन बहिनी अऊ दू भाई हे। रंजीता के पिताजी एसईसीएल छुराकछार म काम करथे अऊ वोखर मां गृहणी हे। स्कूली कक्षा मन म अव्वल रहइया रंजीता ह कक्षा दसवीं म 88 प्रतिशत अऊ कक्षा 12 वीं म 81 प्रतिशत अंक के संग पास करे हे। कक्षा दसवी पास करे के बाद रंजीता ल जिला प्रशासन के अग्रगमन कोचिंग योजना के बारे म शिक्षक मन ले जानकारी होइस।
