छत्तीसगढ़ के किसान मन बर उपयोगी हे कृषि पंचांग: मंत्री श्री रामविचार नेताम

रायपुर, 10 जनवरी 2024। कृषि मंत्री श्री रामविचार नेताम ह आज बीज निगम कार्यालय म इंदिरा गांधी कृषि विश्वविद्यालय कोति ले प्रकाशित कृषि पंचांग – 2024 के विमोचन करिन। श्री नेताम ह कृषि पंचांग के प्रकाशन बर इंदिरा गांधी कृषि विश्वविद्यालय के कुलपति डॉ. गिरीश चंदेल अऊ ऊंखर सहयोगी मन ल बधाई अऊ शुभकामना दीन।
कृषि मंत्री श्री नेताम ह कहिन कि कृषि पंचांग म इंदिरा गांधी कृषि विश्वविद्यालय कोति ले करे जात अनुसंधान अऊ विस्तार कार्य मन के संगेच एकदम नवा कृषि प्रौद्योगिकी अऊ किसान मन बर केन्द्र अऊ राज्य सरकार कोति ले संचालित कई ठन योजना मन के जाकारी के समावेश एमा करे गए हे, जेन किसान मन बर बेहद उपयोगी साबित होही। उमन आशा व्यक्त करिन कि कृषि विश्वविद्यालय प्रदेश के किसान मन के हित म अइसनहे सरलग काम करत रहिही।
इंदिरा गांधी कृषि विश्वविद्यालय के कुलपति डॉ. गिरीश चंदेल ह कृषि मंत्री ल विश्वविद्यालय कोति ले प्रकाशित कृषि पंचांग 2024 के बारे म जानकारी देवत बताइन कि इंदिरा गांधी कृषि विश्वविद्यालय कोति ले पाछू 20 बछर ले कृषि पंचांग अऊ कृषि दर्शिका के प्रकाशन करे जात हे, जेमां कई ठन किसानोपयोगी जानकारी मन के समावेश होथे। उमन बताइन कि कृषि पंचांग म साल के 12 महीना के कलेन्डर अऊ पंचांग के संगे-संग किसान मन बर केन्द्र अऊ राज्य सरकार कोति ले संचालित योजना, इंदिरा गांधी कृषि विश्वविद्यालय कोति ले होवत अनुसंधान, विकास अऊ विस्तार काम, कई ठन फसल मन के नवा उन्नत किस्म, प्रमुख अनाज, दलहन, तिलहन, फल, फूल, सब्जी, मसाला आदि फसल के कृषि कार्यशाला अऊ उत्पादन तकनीक, एकदम नवा कृषि प्रौद्योगिकी, कृषि विश्वविद्यालय के अंतर्गत संचालित कृषि महाविद्यालय मन अऊ कृषि विज्ञान केन्द्र के प्रमुख गतिविधि मन ल सामिल करे जात हे।
विमोचन समारोह म इंदिरा गांधी कृषि विश्वविद्यालय के कुलसचिव श्री जी.के. निर्माम, निदेशक विस्तार सेवाएं डॉ. अजय वर्मा, संचालक अनुसंधान डॉ. विवेक कुमार त्रिपाठी, डॉ. के.एल. नंदेहा, डॉ. ज्योति भट्ट, डॉ. दीप्ति झा, डॉ. जी.पी. आयाम अऊ डॉ. देव प्रकाश पटेल उपस्थित रहिन।