रायपुर, मुख्यमंत्री श्री भूपेश बघेल ले आज इहां ऊंखर निवास कार्यालय म छत्तीसगढ़ के मुंगेली निवासी युवा कृषि स्नातक तरुण साहू ह सौजन्य मुलाकात करिस। तरुण ह मुख्यमंत्री श्री बघेल ल बताइस कि वो ह कुछ युवा मन के संग मिलके ‘कृषि युग’ नाम ले एक स्टार्टअप चालू करे हे, ये स्टार्टअप धान अऊ दार मन के देसी किस्म ल सहेजे, ऊंखर संरक्षण अऊ जैविक तरीका ले ओखर उत्पादन करे के काम करत हे। संगेच देसी उपज मन के परम्परागत रुप ले प्रसंस्करण करके ओ मन ल मार्केट म उपलब्ध करावत हे। मुख्यमंत्री ह तरुण साहू अऊ वोखर स्टार्ट अप के काम मन के सराहना करिन अऊ सफलता बर शुभकामना दीन।
तरुण साहू ह मुख्यमंत्री ल बताइस के वोखर स्टार्टअप ह धान अऊ दार के देसी किस्म के पैकेजिंग अऊ बिक्री के काम एक साल ले करत हे। देसी किस्म के खुशबू, स्वाद अऊ गुणवत्ता के सेती मनखे ए किस्म मन ल हाथों-हाथ लेवत हें। फसल मन के हाईब्रिड किस्म मन म उत्पादन तो जादा होथे, फेर अइसन स्वाद अऊ खुशबू नइ रहय। वो ह येहू बताइस कि नवा दिल्ली के प्रगति मैदान म आयोजित इंटरनेशनल ट्रेड फेयर म वो ह स्टॉल लगाए रहिन, जिहां मनखे मन के बीच वोखर उत्पाद काफी लोकप्रिय होइस। ये ट्रेड फेयर म हर महिना 3-3 टन कोदो-कुटकी के सप्लाई के आर्डर मिले हे। कृषि युग स्टार्ट अप ह स्थानीय किसान मन ल जोड़के ओ मन ल देसी किस्म के जैविक खेती बर प्रोत्साहित करत हे। स्टार्ट अप ह धान के दुबराज, छत्तीसगढ़ देवभोग, जवाफूल, जीराफूल, लोकतीमांझी, तेलकस्तुरी, समुनचीन, ब्लैक राइस संग राहेर अऊ कोदो-कुटकी के देसी किस्म के उत्पादन अऊ मार्केटिंग के काम करत हे। ये बेरा म कृषि विभाग के संयुक्त संचालक श्री आर. एल. खरे घलोक उपस्थित रहिन।
मुख्यमंत्री ह धान अऊ दार के देसी किसिम के मार्केटिंग बर स्टार्टअप शुरु करइया युवा तरुण साहू ल सहराईन
