एग्रीस्टेक अऊ एकीकृत किसान पोर्टल म होही किसान मन के पंजीकरण

पंजीकृत किसान मन ले होही समर्थन मूल्य म धान खरीदी
मंत्रिमंडलीय उप समिति के बैठक आयोजित

रायपुर, खाद्य मंत्री श्री दयालदास बघेल के अध्यक्षता म धान खरीदी अऊ कस्टम मिलिंग के नीति निर्धारण ले संबंधित निर्णय लेहे बर गठित मंत्रिमंडलीय उप समिति के बैठक काली मंत्रालय महानदी भवन म होइस। बैठक म कृषि मंत्री श्री रामविचार नेताम, स्वास्थ्य मंत्री श्री श्याम बिहारी जायसवाल, वित्त मंत्री श्री ओ. पी. चौधरी अऊ राजस्व मंत्री श्री टंक राम वर्मा उपस्थित रहिन।
बैठक म अवइया खरीफ विपणन साल 2025-26 म पंजीकृत किसान मन ले भारत सरकार कोति ले घोषित समर्थन मूल्य म धान खरीदी करे  बर समुचित अऊ पारदर्शी व्यवस्था ठउका करे के निर्देश देहे गए हे। खरीफ साल 2025-26 म किसान मन के पंजीकरण एग्रीस्टेक पोर्टल के संगे-संग एकीकृत किसान पोर्टल म करे जाही। किसान पंजीकरण के काम निरधारित समय-सीमा म संपन्न करे बर व्यापक प्रचार-प्रसार करे के निर्देश घलोक देहे गे हे।
बैठक म ये  घलोक निर्देशित करे गीस के किसान मन ल ऊंखर कोति ले समर्थन मूल्य म बेचे गे धान के भुगतान समय म प्राप्त होवय, एखर बर जरूरी प्रबंध करे जाय। धान उपार्जन बर जरूरी नवा अऊ जुन्ना जूट बारदाना के व्यवस्था समयानुसार ठउका करे के जानकारी देहे गीस। धान के रिसाइक्लिंग रोके बर प्रभावी प्रबंध करे अऊ सीमावर्ती क्षेत्र मन म अवैध धान के रोकथाम बर विशेष जांच दल गठित करे के निर्देश देहे गीस। अइसनहे, उपार्जित धान के मिलिंग बर जरूरी तैयारी करे म घलोक बल दे गीस।
ए बेरा  म बैठक म सचिव खाद्य विभाग श्रीमती रीना बाबा साहेब कंगाले, सचिव वित्त विभाग श्री मुकेश बंसल, सचिव वाणिज्य अऊ उद्योग विभाग श्री रजत कुमार, प्रबंध संचालक छत्तीसगढ़ राज्य सहकारी विपणन संघ श्रीमती किरण कौशल, संघरा सचिव कृषि विभाग श्री राहुल देव अऊ प्रबंध संचालक अपेक्स बैंक श्री के. एन. कांडे उपस्थित रहिन।