अजीत जोगी के वाहन अब मरीज मन के सेवा म काम आही, जोगी परिवार ह करिस जनता ल समर्पित

रायपुर,‌15 अगस्त 2020। छत्तीसगढ़ के पहली मुख्यमंत्री स्व.अजीत जोगी के वाहन ल अब मरवाही म एंबुलेंस के रूप म काम म लाय जाही। स्व. जोगी के धर्मपत्नी अउ कोटा विधायक डॉ.रेणु जोगी ह कहिन हे कि स्व.जोगी के दुर्घटना के बाद ओखर जीवनकाल म एम्बुलेंस वाहन अत्यंत महत्वपूर्ण रहिस। स्व.जोगी जी जब कभू भी वो वाहन म सवार होके कोनो भी सभा समारोह म भाग लेहे बर जाये, तब ओला वाहन ले उतरत देखे बर हजारों के संख्या म लोगन मन के भीड़ लग जाये। एक प्रकार ले स्व.जोगी जी के वाहन ह आकर्षण रहे। अजीत जोगी के निधन के बाद ओखर इच्छानुसार वाहन ल जोगी परिवार के स्मृति म गौरेला-पेंड्रा-मरवाही जिला के लोगन मन ल समर्पित कर दीस हे। अब वाहन गौरेला-पेंड्रा-मरवाही के लोगन मन बर स्वास्थ्य संबंधी सेवा के काम आही। एखर अतिरिक्त अजीत जोगी के दू व्हीलचेयर ल घलो जोगी परिवार ह भेंट करिस हे, जेन ह लोगन मन के काम आ सके। वो वाहन के सुचारू रूप ले संचालन अउ संधारण बर मरवाही के 15 सदस्य मन के एक ट्रस्ट के गठन करे गे हे। जेमा प्रमुख रूप ले बून्द कुंवर मास्को, देवकी ओट्टी, पुश्पेश्वरी सिंह, भगवती पोर्ते, पुष्पा टाडिया, राम शंकरराय, सुनील गुप्ता, प्रताप भानु, गणेश पाण्डेय, कैप्टन राम भजन, विजय चौबे, गंगा केसरी, विरेन्द्र बघेल, अजुर्न सिंह, अर्जुन मार्को, दयाराम पाव सामिल हे।