इंदिरा गांधी कृषि विश्वविद्यालय म अक्ती तिहार अउ माटी पूजन दिवस कार्यक्रम म मुख्यमंत्री सामिल होइन
किसान के पारम्परिक वेश-भूषा म माटी के पूजा करके छत्तीसगढ़ म माटी पूजन महाअभियान के करिन शुभारंभ
मुख्यमंत्री ह स्वामी विवेकानंद कृषि महाविद्यालय इंजीनियरिंग अउ टेक्नोलॉजी रिसर्च सेंटर भवन के लोकार्पण करिन
मुख्यमंत्री ह सबो संभाग मुख्यालय मन म यांत्रिकी स्किल डेव्हलपमेंट सेंटर स्थापित करे के घोषणा करिन
रायपुर, मुख्यमंत्री श्री भूपेश बघेल ह अक्ती परब म छत्तीसगढ़ के माटी पूजन के परंपरा के मुताबिक ठेठ छत्तीसगढ़िया किसान के पारम्परिक वेश-भूषा म धोती कुर्ता पहिर के माटी पूजन करिन अऊ धान बोवाई के रस्म घलोक अदा करके छत्तीसगढ़ म माटी पूजन महाअभियान के शुभारंभ करिन। रायपुर के अभियांत्रिकी महाविद्यालय परिसर म उमन कोठी ले पांच मूठा धान हेर के बइगा ल सउंपिन। बइगा ह धरती मां अऊ ठाकुर देव के पूजा अर्चना करके बोवई बर धान के बीजहा बीज मुख्यमंत्री ल सउंपिस। मुख्यमंत्री ह धरती मां के जयकारा करत धान बीज के छिड़काव करिन। मुख्यमंत्री ह ये बेरा म उपस्थित मनखे मन ल भूइयां के उर्वरता के संरक्षण अउ संवर्धन बर जैविक खेती ल अपनाए के किररिया खवाईन। उमन ट्रेक्टर ले खेत के जोताई तको करिन।
