रायपुर, प्रदेश के कृषि मंत्री श्री रविंद्र चौबे ह आज अपन निवास कार्यालय म इंदिरा गांधी कृषि विश्वविद्यालय कोति ले आयोजित होवईया अक्ती तिहार के लोगो अऊ प्रचार फिल्म के विमोचन करिन। प्रचार फिल्म म मुख्यमंत्री श्री भूपेश बघेल अऊ कृषि मंत्री श्री रविंद्र चौबे के वीडियो संदेश सामिल करे गए हे। अक्ती तिहार अक्षय तृतीया के अवसर म 3 मई 2022 के इंदिरा गांधी कृषि विश्वविद्यालय के अंतर्गत संचालित प्रदेश के कई जिला मन म स्थित सबो कृषि महाविद्यालय मन अऊ कृषि विज्ञान केंद्र मन म आयोजित करे जाही। कृषि मंत्री श्री चौबे ह इंदिरा गांधी कृषि विश्वविद्यालय के कुलपति डॉ गिरीश चंदेल ल अक्ती तिहार आयोजन के सफलता बर शुभकामना दीन।
जानबा हे कि इंदिरा गांधी कृषि विश्वविद्यालय कोति ले छत्तीसगढ़ शासन के कृषि अऊ जैव प्रौद्योगिकी विभाग, बीज निगम आन विभाग मन अऊ संस्था मन के सहयोग ले छत्तीसगढ़ के प्रमुख तिहार अक्षय तृतीया के अवसर म दिनांक 3 मई, 2022 के अक्ती तिहार व्यापक रूप ले मनाए जाही। ये दिन विश्वविद्यालय के अंतर्गत संचालित जम्मो महाविद्यालय, अनुसंधान केन्द्र अऊ कृषि विज्ञान केन्द्र संग करीबन 60 स्थान मन म अक्ती तिहार कार्यक्रम के आयोजन करे जाही। छत्तीसगढ़ शासन के सुराजी गांव योजना के अंतर्गत स्थापित जिला के प्रमुख गौठान मन ल घलोक ये कार्यक्रम ले जोड़े जाही। गौठान समिति, स्व-सहायता समूह मन के सहभागिता घलोक ये कार्यक्रम म ठउका करे जाही। ये बेरा म कृषक, गौठान समिति अऊ स्व-सहायता समूह मन के सदस्य मन ल कई ठन खाद्यान – दलहन, तिलहन, सब्जी, चारा आदि फसल मन के बीज अऊ पौधा विश्वविद्यालय कोति ले विकसित अऊ प्रचलित लघु कृषि यंत्र अऊ औजार मन के विरण घलोक करे जाही। कार्यक्रम के समय कृषक प्रशिक्षण अऊ कृषक संगोष्ठि के आयोजन घलोक करे जाही जेमां किसान मन के तकनीकी समस्या मन के निराकरण करे के प्रयास करे जाही।
इंदिरा गांधी कृषि विश्वविद्यालय के कुलपति डॉ. गिरीश चंदेल ह बताइस कि छत्तीसगढ़ राज्य म अक्ती तिहार (अक्षय तृतीया पर्व) कृषि खातिर महत्वपूर्ण तिहार ये। ये दिन ले किसान अवइया फसल मन बर कार्ययोजना बनाथे। ओ मन अपन खेत म जाके अवइया फसल बर संग्रहित बीज के पूजा अर्चना करथें अऊ कुछ मात्रा म ए मन ल उगाके बीज के अंकुरण क्षमता के परीक्षण घलोक करथें। अक्ती तिहार के अवसर म किसान अवइया फसल बने होवय, ए खातिर ईश्वर ले प्रार्थना घलोक करथें। उमन बताइन कि छत्तीसगढ़ के ये महत्वपूर्ण कृषि पर्व ल विश्वविद्यालय कोति ले वृहद रूप म मनाए के निर्णय लेहे गए हे। ये कार्यक्रम म किसान मन के संगें-संग स्थानीय जन-प्रतिनिधि मन ल घलोक नेवता देहे जाही।
कृषि मंत्री श्री चौबे ह अक्ती तिहार के लोगो अऊ प्रचार फिल्म के विमोचन करिस
