रायपुर, प्रदेश म परत अलकरहा जाड़ ल देखत मुख्यमंत्री दाऊ भूपेश बघेल ह सबो कलेक्टर मन ल हुकुम देहे हे के अपन-अपन जिला म जगा ठउका करके अलाव जलाए अऊ जरूरतमंद मन ल कमरा-ओढ़ना आदि के व्यवस्था ठउका करव। नागरिक मन ल जाड़ के सेती कोनो प्रकार के परेशानी नइ होना चाही। आप मन जानतेच हव के प्रदेश म भंडार कोति ले आवत जड़काला के हवा के सेती छत्तीसगढ़ म अलकरहा जाड़ परत हे अऊ शीतलहर चलत हे। एकरे सेती शहरी अऊ ग्रामीण क्षेत्र मन म कड़ाके के ठंड परत हे। ये समय सरगुजा संभाग म कड़ाके के सर्दी हे। कोरिया जिला म सबले कम तापमान 3.3 डिग्री पहुंच गए। अंबिकापुर ले जशपुर अऊ पेंड्रा तक के तापमान 4 ले 5 डिग्री के बीच पहुंच गए हे। रायपुर म घलोक पाछू साल के अपेक्षा ये साल अड़वड़ जाड़ हे। प्रदेश के ज्यादातर शहर म समवार के भिनसरहा कड़ाके के ठंड महसूस करे गीस। ज्यादातर इलाका मन म सबले कम तापमान सामान्य ले 5 ले 6 डिग्री नीचे पहुंच गए रहिस। मौसम के जानकार मन ह अवइया 24 घंटा म रात के जाड़ अऊ बाढ़े के पूर्वानुमान जारी करे हें।
मुख्यमंत्री ह सबो कलेक्टर मन ल दीन हुकुम, जरूरतमंद मन बर कमरा-ओढना के व्यवस्था ठउका करव
