रायपुर, 20 जून 2024। मुख्यमंत्री श्री विष्णुदेव साय ह कहिन हे कि देश के प्रधानमंत्री श्री नरेन्द्र मोदी के अगुवाई म देश 2047 तक विकसित भारत के रूप ले लेही अऊ ए बेरा म भारत ले सिकल सेल एनीमिया के बीमारी घलोक पूरा खतम हो जही। मुख्यमंत्री श्री विष्णुदेव साय काली अटल बिहारी वाजपेयी आडिटोरियम, मेडिकल कालेज, रायपुर म विश्व सिकल सेल एनीमिया दिवस के अवसर म अपन संबोधन दे रहय रहिन।
मुख्यमंत्री श्री विष्णुदेव साय ह विश्व सिकल सेल दिवस म सिकल सेल के स्क्रीनिंग अऊ जागरूकता कार्यक्रम म सामिल होके सिकल सेल जागरूकता रथ ल रवाना करिन अऊ सिकल सेल ले संबंधित प्रदर्शनी के अवलोकन घलोक करिन। ए दौरान मुख्यमंत्री ह सिकल सेल पीड़ित मन ल जेनेटिक कार्ड तको बांटिन अऊ बस्तर के दूरस्थ क्षेत्र मन म घलोक जागरूकता फैलाय बर सिकल सेल के जानकारी देहे बर हल्बी अऊ गोंडी भाखा के पुस्तिका के विमोचन करिन। ए कार्यक्रम म स्वास्थ्य मंत्री श्री श्याम बिहारी जायसवाल, आदिम जाति कल्याण मंत्री श्री राम विचार नेताम ,शिक्षा मंत्री श्री बृजमोहन अग्रवाल, वन मंत्री श्री केदार कश्यप घलोक उपस्थित रहिन।
कार्यक्रम ल संबोधित करत मुख्यमंत्री श्री विष्णु देव साय ह कहिन कि हर एक मनखे ल सिकल सेल के जांच अऊ परीक्षण जरूरी कराना चाही अऊ एखर रोकथाम बर सबो ल जागरूक होना जरूरी हे। कार्यक्रम ल संबोधित करत स्वास्थ्य मंत्री श्री श्याम बिहारी जायसवाल ह सिकल सेल एनीमिया के रोकथाम म प्रदेश म कार्यरत मितानिन मन के अहम भूमिका के उल्लेख करिन। उमन कहिन कि जागरुकता के माध्यम ले ही ए बीमारी म अंकुश लगाए जा सकत हे अऊ जेनेटिक कार्ड के उपयोग ले एखर उपर प्रभावी रोकथाम लगाए जा सकत हे।
कार्यक्रम म विधायक श्री खुशवंत साहेब, विधायक श्री अनुज शर्मा, विधायक श्री मोती लाल साहू, विधायक श्री पुरंदर मिश्रा, स्वास्थ्य विभाग के अपर मुख्य सचिव श्री मनोज कुमार पिंगुआ, आदिम जाति कल्याण विभाग के प्रमुख सचिव श्री सोनमणि बोरा समेत उच्चाधिकारी, मितानिन बहनें, मेडिकल कालेज के छात्र अऊ स्वास्थ्य कार्यकर्ता उपस्थित रहिन।
