रायगढ़ , 11 सितमबर 2024। वित्तमंत्री श्री ओपी चौधरी ह आज रायगढ़ के रामलीला मैदान म अखिल भारतीय कुश्ती प्रतियोगिता के शुभारंभ करिन। उमन महाराज चक्रधर सिंह अऊ भगवान हनुमान जी के छायाचित्र म पुष्पमाला अर्पित करके प्रतियोगिता के शुभारंभ करिन। वित्तमंत्री श्री चौधरी ह प्रतियोगिता म सामिल सबो खिलाड़ी मन ले परिचय प्राप्त करके बेहतर खेल प्रदर्शन के शुभकामना दीन।
वित्तमंत्री श्री चौधरी कार्यक्रम ल सम्बोधित करत कहिन के ये हर्ष के विसय ये के आप मन सबो 39वां चक्रधर समारोह म सम्मिलित होए हव। मुख्यमंत्री श्री विष्णु देव साय के अगुवइ म ए साल भव्य रूप ले चक्रधर समारोह के आयोजन करे जात हे। उमन कहिन के आज ए अवसर म देश भर ले आए कुल 275 रेसलर्स के बीच कुश्ती प्रतियोगिता के आयोजन कराए जात हे। उमन कुश्ती प्रतियोगिता के सुव्यवस्थित आयोजन बर जिला प्रशासन अउ कुश्ती संघ ल बधाई दीन।
वित्तमंत्री श्री ओपी चौधरी ह राष्ट्रीय कुश्ती प्रतियोगिता के शुभारंभ अवसर म दिल्ली ले आए इंटरनेशनल रेफरी श्री अजीत मान अउ हरियाणा के श्री यशवीर सिंह ढाका ल गदा प्रदान करके सम्मानित करिन। ए बेरा म रायगढ़ कलेक्टर श्री कार्तिकेय गोयल, कुश्ती संघ के श्री दिनेश जायसवाल, श्री राजानंद यादव, श्री श्याम सिंह सोनी, श्री रमन यादव, सुश्री भाविका पाण्डेय, श्री मनोज साहू अउ स्थानीय जनप्रतिनिधि उपस्थित रहिन।
