नित्या के इलाज बर जनदर्शन म माता-पिता के दूर होइस चिंता
रायपुर, 19 सितमबर 2024। मुख्यमंत्री श्री विष्णु देव साय के जनदर्शन कार्यक्रम म भाटापारा ले आये श्री निराला गुप्ता अऊ श्रीमती विद्या गुप्ता ह अपन 4 बछर के नोनी नित्या गुप्ता के इलाज बर आर्थिक मदद के गुहार लगाईन। नित्या बचपन ले ही ना बोल सकय अऊ ना सुन सकय। उमन बताइन के नोनी के इलाज बर पाछू 2 बछर ले कई ठन अस्पताल के चक्कर लगाय के बाद घलोक कोनो सुधार नइ दिखत हे। इहां के चिकित्सक मन ह नोनी के ऑपरेशन के सलाह देहे हें, फेर नोनी छोटे होए के सेती वोकर के माता-पिता ह सहमति नइ देहे हे।
जनदर्शन म नित्या गुप्ता के आवेदन म मुख्यमंत्री श्री विष्णु देव साय ह नोनी के समुचित इलाज बर तुरंत कार्रवाई करे के निर्देश स्वास्थ्य विभाग ल दीन। स्वास्थ्य विभाग ह बेबी नित्या के स्पीच थेरेपी करे के सलाह दीस, जेन म श्रीमती गुप्ता स्पीच थेरेपी बर तैयार हो गीस अऊ लइका के ऑपरेशन थोकन बड़े हो जाय के बाद ही करे म अपन सहमति घलोक दीस।
नित्या गुप्ता के माता-पिता ह बताइस कि उंखर आर्थिक स्थिति अच्छा नइ हे, बच्ची के इलाज म अड़बड़ खर्च हो गए हे। अइसन म मदद बर मुख्यमंत्री जनदर्शन म आए हे। नित्या के माता श्रीमती विद्या गुप्ता ह मुख्यमंत्री के जनदर्शन म आभार व्यक्त करिस। उमन कहिन कि में बच्ची के लंबा समय ले चलत इलाज ले बहुत परेशान हो गए रहेंव अऊ हिम्मत हार गे रहेन अब मुख्यमंत्री ले मिले के बाद नवा उम्मीद मिले हे।
