रायपुर, महिला डॉक्टर ह डॉक्टर पति, सास, ससुर अऊ ननंद उपर दहेज बर प्रताड़ित करे के आरोप लगाए हे। महिला ह पुलिस ल बताए हे के मोर बिहाव डॉ राकेश रमन के संग हिंदू धार्मिक अऊ सामाजिक रीति-रिवाज के मुताबिक होय रहिस। बिहाव के पहिली मोर पति के घरवाले मन मोला देखे ल आए रहिन। ओ बेरा म मोर एमबीबीएस के डिग्री पूरा होए रहिस अऊ मैं आगू अऊ पढ़ना चाहत रहेंव, ते पाए के मोर घरवाले मन मोर इच्छा के मुताबिक मोर बिहाव करे बर मना कर देहे रहिन। हमार घर परिवार वाले मन के मना करे के बाद घलोक उमन हमार रिश्तेदार मन के माध्यम ले घेरी-बेरी खबर भेज के बीसव करे बर हमर उपर दबाव बनाए लगिन तब मोर भाई ह मोर पति के बहिनी दीपिका ल परखर बता दीस के मोर बहिनी अभी पीजी करना चाहथे अऊ अभी बिहाव नइ करना चाहय। ये बात म दीपिका घलोक कहिस के हमन ल पीजी करइया बहू नइ चाही अऊ इहू कहे लगिस के बिहाव नइ करना चाहत हे त अऊ कहूं चक्कर तो नइ हे।
ससुराल वाले मन के लगातार कई माध्यम ले बिहाव बर टोंचे अऊ बिहाव के बाद घलोक पढ़ई करे सकत हे हमला आपत्ति नइ हे कहि के संदेस भेजवाए म हमन बिहाव बर अपन सहमति देहेन। जेखर बाद मोर ससुराल वाले केवल अपन सुविधा के मुाबिक सगई बर दिन सेट करिन अऊ मोर सगई होटल आई.वी.वाय. रायपुर म होइस। मोर पिताजी अउ भाई घरे म सगाई करइया रहिन फेर राकेश के पिताजी दबाव डाल के होटल म सगई कराईन। सगई के बाद मोर पति राकेश ले मोर फोन म बात होत रहिस इही बीच मोर दादाजी अउ नानाजी के निधन हो गे अऊ हमार परिवार म शोक होए के सेती हमन कुछ दिन तक शादी समारोह नइ करना चाहत रहेन फेर मोर ससुराल वाले मन के दबाव म मोर परिवार वाले मन ल बिहाव बर तियार होना परिस। मोर पति राकेश ले सगाई के बाद जब फोन म बात होत रहिस त मोर पति फोन म सिरिफ पइसा के बात करय अऊ अकसर बाते बात म कार के चर्चा करे लग जाए अऊ कहय के भईया ले पूछबे कोन कार महंगा अऊ अच्छा हे, एखर अलावा आन घरेलू सामान अउ जमीन जायजाद के बारे म घलव पूछय कि कोन सा टीवी अच्छा हे, मकान के बाजू म खाली जमीन काकर ये, पिताजी के नाम म कहां-कहां कतेक संपत्ति हे आदि, तब मैं ह राकेश ल स्पष्ट कहि देहे रहेंव कि मोर पिता शिक्षक हे ओकर तिर अतेक पईसा नइ ये। डाक्टरिन के शिकायत म पुलिस जांच म जुट गए हे।
डाक्टरिन ह अपन डॉक्टर पति समेत ससुराल वाले मन उपर लगाइस गंभीर आरोप
