खुर्रा बोनी करके अवईया खरीफ फसल के तैयारी चालू
रायपुर, जांजगीर चांपा जिला के नवागढ़ विकासखण्ड के ग्राम माहौर के किसान श्री शांति लाल के चेहरा म शांति हे। राज्य सरकार के अल्पकालीन ऋण माफी योजना ले अब ओला ऋण वापस करे के चिंता नइ हे। वो ह अवईया फसल बर खुर्रा बोनी के तैयारी चालू कर देहे हे। श्री शांति लाल ह बताइस कि वो खेती किसानी बर पाछू साल 70 हजार रूपिया के कर्ज ले रहिस। छोटे किसान बर अतका बड़ कर्ज एक साल म जमा करना संभव नइ रहिस। कर्ज वापसी के चिंता अउ परिवार के जिम्मेदारी के कारण जीवन कठिन लगत रहिस। राज्य सरकार के अल्पकालीन ऋण माफी योजना ह ओखर सबो कठिनाइ मन के समाधान कर देहे हे।
श्री शांतिलाल ह बताइस कि राज्य सरकार कोति ले अल्पकालीन ऋण योजना के तहत कर्ज माफ हो गए हे। कर्ज माफ होए ले वो ए साल घर के मरम्मत करवात हे। अउ घर के आन जरूरत मन म वो निश्चित होके खर्च करत हे। वो अवईया खरीफ फसल के तैयारी म लग गे हे। उमन कहिन कि कर्ज माफ होए ले ओला खाद बीज मिल गीस। कर्ज माफ नइ होतिस त ए साल ओला बैंक ले खाद बीज नइ मिल पातिस। समर्थन मूल्य म धान बेचे म कर्ज के राशि कटे ले ओला नगद राशि घलोक नइ मिल पातिस। शांति लाल ह अल्पकालीन ऋण माफी योजना ल किसान मन के हित म बतात राज्य सरकार के प्रति आभार व्यक्त करे हे।
