रायगढ़ जिला के किसान मन ल बांटे गीस 15 हजार 486 मैट्रिक टन खातू

18 हजार 452 क्विंटल बीज किसान मन ल बांटे गीस
रायगढ़, जिला के कुल 69 सहकारी समिति मन के माध्यम ले खरीफ साल 2025 म खातू के अग्रिम भण्डारण करत खातू वितरण के काम करे जात हे। रायगढ़ जिला म 20,773 टन खातू के भण्डारण समिति मन ह कर डरे हें अउ 15,486 मैट्रिक टन खातू वितरण जिला के किसान मन ल हो गए हे। संगेच बीज निगम के माध्यम ले किसान मन ल बिजहा उपलब्‍ध कराए जात हे। कुल लक्ष्य 28,920 क्विंटल के विरूद्ध 26,379 क्विंटल बीज के भण्डारण कराए जा चुके हे अउ 18,452 क्विंटल बीज के वितरण किसान मन ल हो गए हे।
फसल के उत्पादकता ल बनाए रखे म पूरा सक्षम हे सिंगल सुपर फास्फेट अउ एनपीके
उप संचालक कृषि श्री अनिल वर्मा ह बताइस के किसान मन के डीएपी के मांग सबले जादा रहे हे, फेर ए साल म डीएपी के सीमित आवक के कारण डीएपी के जगा म आन वैकल्पिक उर्वरक जइसे सिंगल सुपर फास्फेट एनपीके 12:32:16, 20:20:0:13, लिक्विड एनपीके के भरपूर भण्डारण जिला म करे जात हे। सिंगल सुपर फास्फेट अउ एनपीके खातू के बारे म जानकारी देत उमन बताइन के एनपीके 20:20:0:13 अमोनियम फास्फेट सल्फेट उर्वरक म नाइट्रोजन 20 प्रतिशत, फास्फोरस 20 प्रतिशत अउ सल्फर 13 प्रतिशत होथे। उर्वरक म सल्फर के उपलब्धता होए के सेती ये ह फसल मन म क्लोरीफिल अउ प्रोटीन के निर्माण म महत्वपूर्ण भूमिका निभाथे अउ फसल मन म रोग प्रतिरोधक क्षमता बाढ़थे। सिंगल सुपर फास्फेट म स्फुर के मात्रा 16 प्रतिशत के संगे-संग सल्फर 11 प्रतिशत अउ कैल्शियम 21 प्रतिशत होए के सेती मृदा अम्लीयता ल सुधार करके पोषक तत्व मन के उपलब्धता ल बढ़ाथे। जेखर उपयोग ले फसल मन के उत्पादन म वृद्धि करे जा सकत हे।
निरधारित दर ले जादा कीमत म खातू बेचे म होही कार्रवाई
कृषि विभाग कोति ले लगातार दुकान अउ व्यापारी मन के खातू के स्टॉक के जांच करे जात हे अउ किसान मन ल शासन कोति ले निरधारित दर म खातू बेंचे के संबंध म उदुपहा जांच तको करे जात हे। जेखर से खातू के काला बाजारी झन होवय अउ किसान मन ल सही गुणवत्ता के खातू अउ बीज मिल सकय। निरीक्षण के समय खातू के नमूना घलोक लेहे जात हे, अमानक पाए जाय म संबंधित के विरूद्ध अनुशासनात्मक कार्रवाई घलोक करे जाही।